შაქარაშვილი სცემეს და შემდეგ გადააგდეს არაგვში? სცემეს და თვითონ გადავარდა? ხელი ჰკრეს? - ექსპერტიზის პასუხი და კითხვები გამოძიების მიმართ

სამართალი - 14:10, 10 Jul, 2020

3330

ექსპერტიზის დასკვნის თანახმად, გიორგი შაქარაშვილის სიკვდილის მიზეზია ასფიქსია წყალში დახრჩობით.

საგამოძიებო უწყების ინფორმაციით, გიორგი შაქარაშვილის ცხედარს სიცოცხლის პერიოდში მიყენებული დაზიანებები აღენიშნება.

სიცოცხლის დროინდელი დაზიანებებია: შუბლის/თავის, ორივე თვალბუდის, ზედა და ქვედა ტუჩის მიდამოებში, მარჯვენა იდაყვის სახსრისა და მარჯვენა წინამხრის მიდამოებში, აგრეთვე მუცლის, საზარდულის, ბოქვენის, წელისა და ორივე დუნდულოს მიდამოებში.

ექსპერტიზის დასკვნის მიხედვით, აღნიშნული დაზიანებები, იზოლირებულად აღებული, ატარებენ სხეულის დაზიანებათა მსუბუქი ხარისხის ნიშნებს.

ამასთან, პროკურატურამ მიიღო გადაწყვეტილება, გიორგი შაქარაშვილის გარდაცვალების საქმეზე კვალიფიკაციის დაზუსტების შესახებ. კერძოდ, სისხლის სამართლის საქმის უკვე არსებულ კვალიფიკაციას დაემატა დამამძიმებელ გარემოებებში ჯგუფურად განხორციელებული განზრახ მკვლელობა, დანაშაული გათვალისწინებული საქართველოს სისხლის სამართლის კოდექსის 109-ე მუხლის მე-2 ნაწილის „ე“ ქვეპუნქტით და გამოძიება გიორგი შაქარაშვილის გარდაცვალების ნაწილში წარიმართება აღნიშნული კვალიფიკაციით.

სასამართლო-სამედიცინო ექსპერტიზის დასკვნისა და პროკურატურის განცხადების შემდეგ კი საზოგადოებაში კიდევ უფრო მეტი კითხვა გაჩნდა.

დიდ კითხვის ნიშანს იწვევს გადრადაცვალების მიზეზად დასახელებული - ასფიქსია წყალში დახრჩობით, მაშინ, როცა პროკურატურა ბრალს ამძიმებს და შაქარაშვილის საქმეს განზრახ მკვლელობის მუხლი დაემატა.

ამ დრომდე გაურკვეველია სცემეს და შემდეგ გადააგდეს არაგვში გიორგი შაქარაშვილი?

სცემეს და თვითონ გადავარდა თუ ხელი ჰკრეს? - ანუ მთავარი კითხვა - როგორ აღმოჩნდა შაქარაშვილი წყალში პასუხგაუცემელია.

ავტორი: დავით ჯაბაშვილი