„რაც მოხდა ვხვდები, მაგრამ მინდა ბოლომდე მასე არ იყოს“ – სკანდალური აუდიო ჩანაწერი გიორგი შაქარაშვილის საქმიდან

სამართალი - 16:19, 09 Jul, 2020

2060

გარდაცვალებიდან 21-ე დღე და ექსპერტიზის მოლოდინი - ვიდრე დოკუმენტი გამოქვეყნდება, გიორგი შაქარაშვილის საქმეში ახალი დეტალები იკვეთება. "კურიერმა" მოიპოვა საქმის მე-13 ტომი, სადაც ფოტო და აუდიომასალებია, მათ შორის, არასრულწლოვნების სატელეფონო საუბრის ჩანაწერები და სხეულის დაზიანებების ამსახველი კადრები.

"კურიერმა" მოიპოვა ის ფოტომასალები, სადაც ჩანს, რა დაზიანებები მიიღეს ახალგაზრდებმა 18 ივნისის ღამეს. ასევე ის მიმოწერები, რომლებიც 19 ივნისიდან მეგობრებს შორის ხორციელდებოდა და აუდიოჩანაწერი, რომელიც ამოღებულია ბრალდებულ ირაკლი მუმლაძის საქაღალდიდან. უცნობია, ის ახორციელებს თუ არა სატელეფონო ზარს. ერთი წუთის განმავლობაში პირი საუბრობს მომხდარის შესახებ საკუთარ ვერსიებზე, ასახელებს ერთ-ერთ არასრულწლოვანს და ნერვიულობს, რომ არ მოხდეს მისი დაკავება.

"ს.ჩ - მაბოლებ ძმა?
ს:ჩ - დებილს ვგავარ?
----აუუუუუ
სჩ - რა აუ?
ს:ჩ - ანუ მესმის რო შენ სასტავს და ბარნაბას და ვიღაცებს რაღაც უთანხმოება გაქვთ, მაგრამ დანარჩენ ბავშვებსაც შარში ნუ გახვევთ," - აღნიშნულია ჩანაწერში, რომელიც "კურიერმა" მოიპოვა.

"აუ რავი რა ძმა, მე არ ვიცი იქ წესიერად რა მოხდა და როგორ მოხდა, მაგრამ მე ასე მგონია მე, რომ ვყოფილიყავი სხვანაირად მოხდებოდა. ჩემო ... ისე ვნერვიულობ ვერცერთი მელაპარაკებით ნორმალურად რა მოხდა, კი ვხვდები მაგრამ ... ბოლომდე მინდა მასე არ იყოს როგორც ვხვდები. "ლიჟბი" ჩვენები კარგად იყვნენ და "დალშე" ძმა სულ ... ვინ როგორ იქნება. აი ქანაშვილზე, რომ გავიგო რამე მოუვიდა ძმა და ღმერთმა დაიფაროს და "სროკზე" გაიჩითოს... არ ვლაპარაკობ ისეთ რაღაცას, ხომ აზრზე ხარ, რომ ტელეფონში სალაპარაკო არ იყოს. აი კი არ გავგიჟდები, აი .... ძმა. აი, სულ მაგაზე მეფიქრება ძმა ვინც რაზე არ უნდა მელაპარაკოს ძმა, სულ მაგაზე ვფიქრობ "ლიჟბი" კარგად იყოთ თქვენ რა," - აღნიშნულია ჩანაწერში, რომელიც "კურიერმა" მოიპოვა.

შეგახსენებთ, 19 წლის ფეხბურთელ გიორგი შაქარაშვილის გარდაცვალების საქმეზე გამოძიება 3 მუხლით მიმდინარეობს: თავისუფლების უკანონოდ აღკვეთა, ძალადობა და ჯგუფური ძალადობის ორგანიზება. საქმეზე 17 პირს აღკვეთის ღონისძიების სახით პატიმრობა აქვს შეფარდებული.

გიორგი შაქარაშვილის გაუჩინარების შესახებ ოჯახმა პოლიციას 19 ივნისს მიმართა.19 წლის ფეხბურთელი ბოლოს მცხეთაში, ნარეკვავის დასახლებაში წვეულებაზე იმყოფებოდა. ოთხდღიანი საძიებო სამუშაოების შემდეგ 22 ივნისს ის მდინარე არაგვში გარდაცვლილი იპოვეს. გარდაცვალების გარემოებები კვლავ დაუდგენელია, ცხედარს დაზიანებები აღენიშნება.