ენერგეტიკის მინისტრის მოადგილე USAID -ის ახალი პროექტის პრეზენტაციას დაესწრო

ბიზნესი & ეკონომიკა - 18:59, 14 Nov, 2013

2785

საქართველოს ენერგეტიკის მინისტრის მოადგილე მარიამ ვალიშვილი აშშ-ის საერთაშორისო განვითარების სააგენტოს (USAID) „ჰიდროგენერაციისა და ენერგეტიკის დაგეგმვის პროექტის“ (HPEP) პრეზენტაციას დაესწრო.
პროექტის ფარგლებში, USAID-ი „საქართველოს ჰიდროენერგეტიკული ბაზრის მოდელი 2015“-ის (GEMM 2015) დოკუმენტს შეიმუშავებს, ასევე ენერგეტიკის სამინისტროს ეროვნული ენერგეტიკული პოლიტიკისა და სტრატეგიის დამუშავების პროცესში მნიშვნელოვან დახმარებას გაუწევს.
HPEP-ის განხორციელებით აშშ-ს მთავრობა ხელს შეუწყობს საქართველოს მონაწილეობას ენერგეტიკის რეგიონალურ და საერთაშორისო ვაჭრობაში, ქვეყნის ენერგეტიკულ დამოუკიდებლობასა და სტაბილურობას.
USAID-ი აგრძელებს საქართველოს მთავრობის მხარდაჭერას ჰიდროენერგეტიკაში კერძო ინვესტიციების სტიმულირებისთვის. HPEP-ი USAID-ის „ჰიდროენერგეტიკაში ინვესტიციების ხელშეწყობის პროექტის“ (HIPP) შემდგომი პროექტია.
გასულ წელს ენერგეტიკის სამინისტროსა და USAID-ს შორის ურთიერთანამშრომლობის მემორანდუმი გაფორმდა, რომელიც ითვალისწინებს ელექტროენერგიის ბაზრის ახალი მოდელის შემუშავებას. აგრეთვე მომზადდა სექტორის SWOT ანალიზი, რომელიც საფუძვლად დაედება ახალი სტრატეგიის დოკუმენტს.
ახალი რეალობების და საჭიროებების გათვალისწინებით, ბაზრის მოდერნიზება ხელს შეუწყობს ჰიდროენერგეტიკის დარგში კერძო სექტორის განვითარებას, ტრანს-სასაზღვრო ვაჭრობის ხელშეწყობას, საინვესტიციო რისკების შემცირების მექანიზმების დახვეწას.
მოდელზე მუშაობა 2014 წლის ბოლომდე დასრულდება, ხოლო მისი დანერგვა ეტაპობრივად უკვე 2015 წლიდან დაიწყება.