აღნიშნული გადაწყვეტილება სახელმწიფო ქონების განკარგვის მიზნით დადებულ ხელშეკრულებებთან დაკავშირებული საკითხების შემსწავლელმა კომისიამ მიიღო. 

როგორც დღეს კომისიის თავმჯდომარემ, დიმიტრი ქუმსიშვილმა ჟურნალისტებს განუცხადა, ამ დროისთვის ინვესტორებისთვის სრულად ნაპატიები თანხის ოდენობა 2 მილიონ 800 ათას ლარს შეადგენს.

ქუმსიშვილის განცხადებით, მთავრობის სხდომაზე საკითხი გავა 4 მილიონ 600 ათასი ლარის პატიებასთან დაკავშირებით. დიმიტრი ქუმსიშვილი იმედოვნებს, რომ მთავრობა ამ საკითხს მხარს დაუჭერს.

"ასევე არიან კომპანიები, რომლებსაც პირობით ვაპატიეთ ჯარიმები, რათა მათ განაახლონ საქმიანობა. აქ საუბარია ძალიან ბევრ მილიონზე. პირობით ნაპატიებია 10 მილიონ ლარზე მეტი, რაც ჩვენ გვაძლევს შესაძლებლობას, ინვესტორებმა განაახლონ საქმიანობა და მივაღწიოთ ახალ შეთანხმებებს", - აღნიშნა ქუმსიშვილმა.

მისივე განმარტებით, ეს ყველაფერი ინვესტიციების წახალისების მიზნით კეთდება.

სახელმწიფო ქონების განკარგვის მიზნით დადებულ ხელშეკრულებებთან დაკავშირებული საკითხების შემსწავლელი კომისია ეკონომიკის მინისტრ გიორგი კვირიკაშვილის ინიციატივით საქართველოს მთავრობის 28 მარტის დადგენილებით შეიქმნა. კომისიის შემადგენლობაში შედიან ეკონომიკის, ფინანსთა, ინფრასტრუქტურის, შინაგან საქმეთა და იუსტიციის სამინისტროები და სახელმწიფო ქონების ეროვნული სააგენტო. კომისიის სხდომებზე ხმის უფლებით იმ სამინისტროებსაც იწვევენ, რომლებსაც განსახილველი საკითხი უშუალოდ ეხებათ. კომისია მხოლოდ იმ საქმეებს განიხილავს, სადაც საპატიებელია სულ მცირე, 100 ათასი ლარის ოდენობის პირგასამტეხლო, ხოლო საინვესტიციო ვალდებულების შესრულების პერიოდის გადავადება ერთი წლით მოითხოვება. კომისიის წევრები რეგულარულად, თვეში ერთხელ იკრიბებიან. კომისიის თავმჯდომარის ინფორმაციით, ამ დროისთვის განხილულია 50-ზე მეტი კომპანიის საქმე, თუმცა პროცესი გრძელდება.მისივე განმარტებით, ეს ყველაფერი ინვესტორების წახალისების მიზნით კეთდება.