19 წლის ფეხბურთელს, გიორგი შაქარაშვილს მეოთხე დღეა უშედეგოდ ეძებენ - „ნიუპოსტის“ ინფორმაციით, მცხეთის პოლიციაში იმ ახალგაზრდების გამოკითხვა დღესაც გრძელდება, რომლებიც დაბადების დღის წვეულებას ესწრებოდნენ.

არსებული ინფორმაციით, პოლიციამ უკვე გაჩხრიკა სახლი სადაც დაპირისპირება მოხდა. ერთ-ერთი ვერსით, სამართალდამცავებმა ადგილზე ბლაგვი საგანი იპოივეს, რომელსაც ექსპერტიზა უტარდება.

ჩვენი ინფორმაციით, წვეულებაზე მომხდარ დაპირისპირებაში დაშავდა გურამ ამირხანაშვილი მას ხელისა და ფეხის არეში დაზიანებები აღენიშნება, თუმცა პოლიციაში თქვა, რომ მას არა წყნეთში, არამედ თბილისში, ნახალოვკაში გაუსწორდნენ.

გურამ ამირხანაშვილი ოქროს მოწმეა, სწორედ ის იყო გიორგი შაქარაშვილთან და ერთ-ერთი ვერსიით, კონფლიქიტის ადგილი ხელჩართული ჩხუბის შემდეგ ერთად დატოვეს.

"ნიუპოსტისთვის" მოწოდებული ინფორმაციის თანახმად, ახალგაზრდებს ავტომობილით ორი ბიჭი დაეწია. ამირხანაშვილი მანქანაში ჩაისვეს, ხოლო შაქარაშვილმა გაქცევა მოასწრო. დასისხლიანებული ამირხანაშვილი თბილისში, ქუჩაში დააგდეს.

ნაცემია კიდევ ერთი ახალგაზრდა - ვახო ახვლედიანი, თუმცა მის კავშირზე დაპირისპირებაში "ნიუპოსტის" წყაროს ინფორმაცია არ აქვს.

მცხეთაში დაკარგული გიორგი შაქარაშვილის საქმეზე გამოძიება 143-ე მუხლით არის დაწყებული, რაც თავისუფლების უკანონო აღკვეთას გულისხმობს.

შაქარაშვილის დაკარგვის შესახებ ოჯახმა შინაგან საქმეთა სამინისტროს 19 ივნისს, დაახლოებით 11 საათზე მიმართა.