ზუგდიდში დაჭრილ პოლიციელთან დაკავშირებით, ზუგდიდის რესპუბლიკური საავადმყოფოს სამედიცინო მენეჯერი, ნიკოლოზ ჭედია კომენტარს აკეთებს. ჭედიას თქმით, პაციენტი რეანიმაციულ განყოფილებაშია მოთავსებული, სამართალდამცავის მდგომარეობა მძიმეა, მაგრამ სტაბილური.

გავრცელებული ინფორმაციის თანახმად, გოგა ანჩაბიძეს სხეულზე მრავლობითი ჭრილობები ბასრი საგნით აქვს მიყენებული და მოტეხილი აქვს ქვედა კიდური.

შეგახსენებთ, რომ დაჭრილი პოლიციელი ზუგდიდში, პრეზიდენტის რეზიდენციასთან, დაახლოებით ორი საათის წინ იპოვეს. თვითმხილველების თქმით, დაზარალებული უცნობმა პირებმა ტაქსიდან ჩამოაგდეს და ადგილზე დატოვეს. საქმეზე აღძრულია სისხლის სამართლის საქმე.