ტელეკომპანია „იმედის" ეთერში ეკონომიკის მინისტრმა გიორგი კვირიკაშვილმა განაცხადა, რომ ისინი ყველა საშუალებით ცდილობენ, თბილისის შემოვლითი რკინიგზის პროექტის შეჩერება არ მოხდეს.

„ჩვენ ვეძებთ გზებს, რათა თბილისის შემოვლითი რკინიგზის პროექტთან მიმართებაში უკეთესი გადაწყვეტილება მივიღოთ“, ამბობს კვირიკაშვილი და განმარტავს, რომ რადგან დღეს „საქართველოს რკინიგზის" ბონდებით საერთაშორისო ბაზრებზე ვაჭრობენ,  უარყოფითი გადაწყვეტილებები კომპანიის კორპორატიული ვალდებულებების ფასზე უარყოფითად აისახება.

„საქართველოს რკინიგზამ" მოიწვია გერმანული საექსპერტო კომპანია, რომელმაც დადო დასკვნა, რომ წლის განმავლობაში 18 გრადუსიან დახრაზე ერთი ლოკომოტივით სიარული არ შეიძლება და საჭიროა 2 ლოკომოტივი. ეს სერიოზულად ზრდის რკინიგზის დანახარჯებს და ყველაზე ცუდი რაც არის - ამცირებს მოძრაობის სიჩქარეს. ანუ გამტარუნარიანობაზე ძალიან უარყოფითად მომედებს. 

პირდაპირ გეტყვით, ჩემი ძალიან დიდი სურვილია, რომ თბილისის შემოვლითი რკინიგზის პროექტი გაგრძელდეს და არა მარტო ჩემი. ეკონომიკურ გუნდს გვქონდა რამოდენიმეჯერ მსჯელობა და ვეძებთ იმ ტექნიკურ გადაწყვეტებს, რომლის შემთხვევაშიც ეს პროექტები იქნება გაგრძელებული"- აცხადებს გიორგი კვირიკაშვილი. 

შეგახსენებთ, რომ „თბილისის შემოვლითი რკინიგზის პროექტის" განხორციელებით, სარკინიგზო ინფრასტრუქტურის თბილისის ცენტრიდან ქალაქის ჩრდილოეთ ნაწილში გადატანით სატვირთო და სამგზავრო მატარებლები აღარ გადაკვეთენ თბილისის ცენტრალურ ნაწილს. 

ქალაქის მერია ფიქრობს, რომ პროექტს მნიშვნელოვანი სარგებლის მოტანა შეუძლია ქალაქისთვის, მათ შორის მომავალში გარემოსა და უსაფრთხოებასთან დაკავშირებული პრობლემების თავიდან აცილების უზრუნველყოფა, ეკონომიკური გაუმჯობესება და ახალი სამუშაო ადგილების შექმნა ინფრასტრუქტურის გადატანის შედეგად გამოთავისუფლებული მიწის კომერციული განვითარების შედეგად.

პროექტი მთლიანობაში მოიცავს 30 კმ სიგრძის ახალი ორლიანდაგიანი სარკინიგზო ხაზის მშენებლობასა და არსებული 10 კილომეტრიანი ხაზის რეკონსტრუქციას.