"შეიძლება ჩვენი სფერო საერთოდ გაქრეს ამ ქალაქიდან" - გასართობი ბიზნესის წარმომადგენლები მერიისგან გამოუყენებელი სარეკრეაციო სივრცეების გადაცემას ითხოვენ

ბიზნესი & ეკონომიკა - 19:32, 26 May, 2020

1065

თბილისის კლუბებისა და ბარების მეპატრონეებმა დღეს ერთობლივი განცხადება-პეტიცია წარადგინეს.

მათ მიერ გავრცელებულ მიმართვაში საუბარია იმ მძიმე ვითარებაზე, რაც პანდემიამ შექმნა არა მხოლოდ ბარებისა და ღამის კლუბების შემთხვევაში, არამედ მთლიანად ტურიზმის სექტორში.

გასართობი ბიზნესის წარმომადგენლები ხელისუფლებისგან კონკრეტული სამუშაო გეგმის შედგენას, ასევე ფინანსურ დახმარებას და საგადასახადო შეღავათებს ითხოვენ. მათ თბილისის მერს ასევე სთხოვეს, რომ მათთვის გამოიყოს მიტოვებული რეკრეაციული ზონები, სადაც თავიანთ საქმიანობას ღია სივრცეში გადაიტანენ, რათა კორონავირუსის გავრცელება არ მოხდეს.

"დაუყოვნებლივ უნდა დადგინდეს დახურული ბარების, კლუბებისა და მუსიკალური სივრცეების გახსნის თარიღი. ასევე ჩვენთან ერთად უნდა იქნას შემუშავებული რეგულაციები და დირექტივები, იმისთვის რომ ჩვენმა სექტორმა სრულიად შეძლოს თავისი ეკონომიკური როლის დაბრუნება, მინიმუმ აუცილებელია ერთწლიანი საშეღავათო პერიოდი გადასახადების კუთხით", - ნათქვამია განცხადებაში.

იმ შემთხვევისთვის, თუ კლუბებისა და ბარების მეპატრონეებს დახურული ობიექტების გახსნის შესაძლებლობა არ მიეცემათ, მათი წარდგენილი ინიციატივის თანახმად, უნდა მიეცეთ უფლება სახელმწიფოს ბალანსზე არსებულ ცენტრალურ, მაგრამ გამოუყენებელ სივრცეებში შექმნან ქვეყნის საიმიჯო პროდუქტი "გადარჩენის პარკი", სადაც არსებული დახურული ბარები თავიანთ ღია ვარიანტებს წარმოადგენენ.

"შეიძლება ჩვენი სფერო საერთოდ გაქრეს ამ ქალაქიდან, გაქრეს სფერო, რომელსაც ძალიან მნიშვნელოვანი როლი უჭირავს ქვეყნის ეკონომიკურ, სოციალურ და კულტურულ ცხოვრებაში", - ამბობს კლუბ "ბასიანის" დამფუძნებელი ნაჯა ორაშვილი.