"დაუჭრელი და ცოცხალი ვარ, მადლობა ღმერთს" - არქიმანდრიტ საბა ჟღენტის პირველი კომენტარი

შემთხვევა - 16:08, 22 Apr, 2020

2637

ყინწვისის კეთილგონიერი ავაზაკის წინამღვარი, არქიმანდრიტი საბა ჟღენტი ირწმუნება, რომ მონასტრის წინამძღვარს, მამა დავით აქიაშვილს არ დაუჭრია, და საერთოდ მას დაზიანებები არ აღენიშნება.

სასულიერო პირი ამბობს, რომ ის "ცრუ ინფორმაციის გავრცელებით გულნატკენია".

"მხედავთ, როგორ ვარ და რა მდგომარეობაში ვარ, დაუჭრელი და ცოცხალი ვარ, მადლობა ღმერთს", - განაცხადა სასულიერო პირმა TV პირველის ეთერში.

„გულნატკენი ვარ, რომ ასეთი ცრუ ინფორმაცია ვრცელდება. ჩვენ მშობლები, ახლობლები გვყავს და ასეთი ცრუ ინფორმაცია რომ ვრცელდება, ვიღაცაზე ეს ცუდად მოქმედებს… ძალიან ძნელია ამის ატანა"- დასძინა არქიმანდრიტმა.

კითხვაზე, რატომ დაიწყო შსს-მ გამოძიება იარაღის უკანონოდ შეძენა/შენახვის მუხლით არქიმანდრიტი ამბობს, რომ არ იცის:

„შსს-მ ჩაატარა ოპერაცია, საიდან ამოიღო ის იარაღი… მე არ ვიცი, ვის ჰქონდა იარაღი… შსს ბევრ სამუშაოს ატარებს და ბევრგან აქვს იარაღი ამოღებული, მე რომ ეს ინფორმაცია მქონდეს, მაშინ ტაძრის წინამძღვარი კი არა, ვიქნებოდი შსს მინისტრი და მეცოდინებოდა, რომელი იარაღი საიდან ამოიღეს. მე ვარ კეთილგონიერი ავაზაკის სახელობის მონასტრის წინამძღვარი, საბა ჟღენტი, არქიმანდრიტი.

მე უარვყოფ იმას, რომ აქ საბას კოშკში რაიმე ოპერაცია ჩატარდა და იარაღი ამოიღეს. და მამა დავითთან რა მოხდა ტაძარში, რა იარაღი ამოიღეს, ეს მე არ ვიცი. მამა დავითს უნდა ჰკითხოთ. მე არ მაქვს ინფორმაცია…“, – განაცხადა სასულიერო პირმა.