ცეზარ ჩოჩელი ყავის ქართული ბაზრის 30–40%

ცეზარ ჩოჩელი ყავის ქართული ბაზრის 30–40%–ის ათვისებას გეგმავს

ბიზნესი & ეკონომიკა - 11:13, 06 Nov, 2013

2664

ბიზნესმენი ცეზარ ჩოჩელი ყავის ქართული ბაზრის 30–40%–ის დაკავებას აპირებს და ცნობილი უცხოური ბრენდებისთვის კონკურენციის გაწევას გეგმავს. ბიზნესმენი ამბობს, რომ მის გეგმებში სრულიად ახალი საწარმოს მშენებლობა შედის, რომელიც ლტოლვილთა დასახლებაში აშენდება. ამ დროისთვის კი ბიზნესმენი პოტენციურ პარტნიორებთან მოლაპარაკებებს მართავს. ჩოჩელის ინფორმაციით, მისი საწარმო ყავის წარმოებას 2015 წლიდან დაიწყებს და ის კონკურენციას ისეთ მსოფლიო ბრენდებს გაუწევს, როგორიც "პელე" და "ჩიბოა", თუმცა იმპორტირებული ყავის სრულად ჩანაცვლებას არ გეგმავს და განმარტავს, რომ ისინი ქართული ბაზრის მხოლოდ 40 %–ს დაიკავებენ, რადგან სხვა შემთხვევაში, ანტიმონოპოლიური კანონმდებლობის მოქმედების პირობებში, მონოპოლისტებად იქნებიან განხილულნი. „ჩვენ მხოლოდ ქართულ ბაზარზე ორიენტირებულნი არ ვიქნებით, ვგეგმავთ ექსპორტსაც მსოფლიოს სხვადასხვა ქვეყანაში,“ – აცხადებს ჩოჩელი. მისივე თქმით, საწარმო, რომელიც ლტოლვილთა ერთ–ერთ დასახლებაში აშენდება, ულტრათანამდროვე ტექნოლოგიებით აღიჭურვება და უცხოეთიდან ხსნადი ყავის დასამზადებლად მხოლოდ ნედლეული შემოვა. ამის გარდა, ბიზნესმენი ცეზარ ჩოჩელი კიდევ სამი ახალი პროექტის დაწყებას გეგმავს, მათ შორის საუბარია კვების პროდუქტების – ჩიფსების, სნეკების და ასევე, სამშენებლო მასალების წარმოებაზე. პროექტებში ცეზარ ჩოჩელი 100 მლნ-ის ინვესტიციის ჩადებას აპირებს.