სასტიკი მკვლელობა გურჯაანში - მამამ 3 თვის შვილი მოკლა

კრიმინალი - 14:07, 28 Mar, 2020

3153

საზარელი მკვლელობა მოხდა გურჯაანის მუნიციპალიტეტის სოფელ ვეჯინში. როგორც ირკვევა, მამამ 3 თვის შვილი მოკლა და ჩვილის დედა, საკუთარი ცოლი დაჭრა. ადგილზე ექსპერტ-კრიმინალისტები მუშაობენ. რა გახდა საზარელი მკვლელობის მოტივი ამ დროისთვის უცნობია.

შინაგან საქმეთა სამინისტროში კი "ნიუპოსტს" განუცხადეს, რომ მკვლელობაში ბრალდებული ცხელ კვალზე დააკავეს.

"შინაგან საქმეთა სამინისტროს ინფორმაციით კახეთის პოლიციის დეპარტამენტის გურჯაანის რაიონული სამმართველოს თანამშრომლებმა, ცხელ კვალზე ჩატარებული ოპერატიულ-საგამოძიებო მოქმედებების შედეგად, 1996 წელს დაბადებული ი.ნ.-ს დამამძიმებელ გარემოებაში ოჯახის წევრის მიმართ ჩადენილი განზრახ მკვლელობის ბრალდებით დააკავეს.

დანაშაული 13-დან 17 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ გურჯაანის მუნიციპალიტეტის სოფელ ვეჯინში, მეუღლესთან და შვილთან ერთად სტუმრად მყოფმა ი.ნ.-მ, ცივი იარაღით სასიკვდილო ჭრილობა მიაყენა, შვილს - 2019 წელს დაბადებულ ქ.ნ.-ს, რომელიც მიღებული ჭრილობის შედეგად, ადგილზე გარდაიცვალა. ბრალდებულმა ასევე ცივი იარაღის გამოყენებით მრავლობითი ჭრილობები მიაყენა მეუღლეს- 1996 წელს დაბადებულ შ.ც.-ს. დაჭრილი სასწრაფო-სამედიცინო დახმარების ბრიგადამ საავადმყოფოში გადაიყვანა.

სამართალდამცველებმა ბრალდებული შემთხვევის ადგილზე დააკავეს.

პოლიციამ დანაშაულის ჩადენის იარაღი - დანა ნივთმტკიცების სახით ამოიღო.

დაკავებული აღიარებს დანაშაულს.

გამოძიება დამამძიმებელ გარემოებაში ოჯახის წევრის მიმართ ჩადენილ განზრახ მკვლელობის ფაქტზე, სისხლის სამართლის კოდექსის 11 პრიმა 109-ე მუხლის "ბ" და "დ" ქვეპუნქტებით მიმდინარეობს"- აცხადებენ უწყებაში.