იმპორტირებული ხორბალი გაძვირდა. როგორც ტრეიდერი კომპანია ”აგრიკომის” ხელმძღვანელმა, კოკი ოსიპოვმა,  „ბიზნესპრესნიუსს“ განუცხადა, ფოთის პორტამდე ტრანსპორტირებული ერთი ტონა ხორბლის ფასმა 2 ნოემბერს 25 დოლარით მოიმატა და 305 დოლარი შეადგინა.

ტრეიდერის თქმით, დღეისათვის საქართველოში მარცვლეულის  90% რუსეთიდან შემოდის. მეზობელ ქვეყანაში კი, თავდაპირველად, ხორბლის მაღალ მოსავალს პროგნოზირებდნენ, თუმცა, რეალური მაჩვენებელი გაცილებით დაბალი აღმოჩნდა.

”ხორბლის გაძვირება ფქვილზეც აისახება, სავარაუდოდ, ერთი ტომრის ფასი 2 ლარით გაძვირდება და 40 ლარს მიაღწევს”, - ვარაუდობს ოსიპოვი.

”აგრიკომის” ხელმძღვანელის პროგნოზით, ზამთრის სეზონის დადგომასთან ერთად, ფასები იმპორტირებულ ხორბალზე კიდევ აიწევს.

”რუსულ პორტებში წყალი იყინება, ტრანსპორტირება გართულდება, საჭირო გახდება ყინულმჭრელების ორგანიზება. ეს ყველაფერი დამატებითი ხარჯია. ვფიქრობ, მარცვულეული ყოველთვიურად ტონაზე, საშუალოდ, 7-10 დოლარით გაძვირდება”, - განაცხადა კოკი ოსიპოვმა.