გადაიდება თუ არა ევროპის საფეხბურთო ჩემპიონატი EURO-2020

სპორტი - 20:52, 10 Mar, 2020

6757

UEFA ჯერჯერობით არ გეგმავს ფეხბურთში ევროპის ჩემპიონატის გადადებას, აცხადებენ საფეხბურთო ასოციაციის პრეს სამსახურში.

"ამჟამად არანაირი ცვლილებების აუცილებლობა არ არის. ეს საკითხი მუდმივი კონტროლის ქვეშ გვაქვს," - აცხადებენ ორგანიზაციაში.

როგორც ცნობილია, "ევრო 2020"-ის გადადების თხოვნით UEFA-ს ევროპის თითქმის ყველა ეროვნულმა ფედერაციამ მიმართა. მათი არგუმენტი კორონავირუსის გამო ადგილობრივი საფეხბურთო მატჩების განრიგში მომხდარი ცვლილებებია. ისინი ითხოვდნენ, რომ ევროპის ჩემპიონატი მაშინ დაწყებულიყო, როდესაც ადგილობრივი ჩემპიონატები მეტნაკლებად დასრულებული იქნებოდა.

როგორც ცნობილია, COVID-19-ის საფრთხის გამო იტალიის ჩემპიონატის რამდენიმე მატჩი გადაიდო, ხოლო ესპანეთში, საფრანგეთში და პორტუგალიაში მატჩები მაყურებლების გარეშე ტარდება.

EURO-2020 წელს განსხვავებული სისტემით ტარდება. ის სტარტს 12 ივნისს რომში აიღებს და თამაშები ევროპის 13 სხვადასხვა ქალაქში გაიმართება. ესენია: ამსტერდამი, დუბლინი, ბუქარესტი, კოპენჰაგენი, ბილბაო, ბუდაპეშტი, ბრიუსელი, გლაზგო, მიუნხენი, რომი, სანკტ-პეტერბურგი, ბაქო. ხოლო ნახევარფინალები და ფინალი (12 ივლისს) ლონდონში.

შეგახსენებთ, რომ საქართველოს ეროვნულ ნაკრებს ევრო 2020-ის ფინალურ ტურნირზე მოხვედრის რეალური შანსი აქვს. მას ჩემპიონატზე მონაწილეობისთვის 2 მატჩის მოგება სჭირდება - 26 მარტს, თბილისში, ნახევარფინალში, ქართველი ფეხბურთელები ბელორუსის ეროვნულ ნაკრებს დაუპირისპირდებიან და გამარჯვების შემთხვევაში 31 მარტს, ასევე თბილისში, ჩრდილოეთ მაკედონიისა და კოსოვოს ეროვნულ ნაკრებების დაპირისპირებაში გამარჯვებულს შეხვდებიან.

ამ მატჩებში წარმატების შემთხვევაში საქართველოს ნაკრები ფინალური ეტაპის C ჯგუფში მოხვდება, სადაც მას ჰოლანდიის, უკრაინისა და ავსტრიის გუნდები ელოდება, ან თუ რუმინეთის საფეხბურთო ნაკრები ასევე წარმატებით დაძლევს პლეი-ოფს, F ჯგუფში გადაინაცვლებს, სადაც პორტუგალიის, საფრანგეთისა და გერმანიის ნაკრებები მოხვდნენ..