"ერი თვითგვემაშია" - ზურაბიშვილის აქცენტი უმადურობაზე

პოლიტიკა - 15:05, 04 Mar, 2020

1280

საქართველოს პრეზიდენტმა თავის 40 წუთიან სიტყვაში ხაზი თვითგვემას და უმადურობას გაუსვა.
სალომე ზურაბიშვილის თქმით, მიგრაციას არამხოლოდ უმუშევრობა, არამედ სიძულვილი და აგრესია იწვევს.

"პირველ რიგში, ჩვენ გვჭირდება საკუთარი თავის დანახვა და შესაძლებლობების რეალურად შეფასება.
უმადურობასა და თვითგვემაში ჩაკარგულები ვერ ვაფასებთ, თუ რამდენ წარმატებას მიაღწია საქართველომ ბოლო ათწლეულების განმავლობაში. დამოუკიდებლობის აღდგენიდან არ გასულა 30 წელი და უკვე ვდგავართ ევროპის კართან, როგორც მოწინავე ასოცირებული წევრი.

როცა რეფერენდუმის შედეგებსა და სამფეროვანი დროშის აღმართვას ვზეიმობდით, ნამდვილად ვერ ვიფიქრებდით, რომ, ისტორიისთვის ამ მოკლე პერიოდში, საქართველო ევროკავშირთან თავისუფალ მიმოსვლასა და თავისუფალ ვაჭრობას მიაღწევდა და გახდებოდა ნატოსათვის ერთ-ერთი ყველაზე სანდო და დაფასებული პარტნიორი”, – განაცხადა ზურაბიშვილმა.

საქართველოს პრეზიდენტის თქმითვე, აგრესიამ, სიძულვილმა, შეურაცხყოფამ შეცვალა ქართულ ღირებულებათა სისტემა.

"მივიღეთ: აგრესია - შემწყნარებლობის ნაცვლად. სიძულვილი - სიყვარულის ნაცვლად. შეურაცხყოფა - ზრდილობის ნაცვლად. ეგოიზმი და კარჩაკეტილობა - სოლიდარობის ნაცვლად. შიში - ტრადიციული სიმამაცის ნაცვლად.

ღირებულებები, რომლებიც ქართული კულტურის წიაღიდან, ქრისტიანობიდან, რუსთაველიდანაა ამოზრდილი, დღეს მთლიანად, ან თითქმის მთლიანად უარყოფილია. საზოგადოება ერთგვარ დეპრესიაშია. ჩვენ საკუთარ თავს ვეღარ ვცნობთ.

ეს, ძირითადად, იმიტომ გვემართება, რომ ჩაძირული ვართ საკუთარ თავში, პოლიტიკურ ციებ-ცხელებაში. სიძულვილს, შეურაცხყოფასა და აგრესიას მიაქვს ჩვენი ენერგია"- თქვა მან.