პარლამენტის თავმჯდომარის თავდასხმა ოპოზიციაზე - არჩილ თალაკვაძის თქმით, ნაციონალური მოძრაობა და "მისი განაყოფი პარტია" ხალხის ინტერესებით, ხმებით და მანდატებით ვაჭრობს.

მეტიც, თალაკვაძე ამბობს, რომ ეს ძალები მაქსიმალურად ცდილობენ "ტყვეობაში აიყვანონ მთელი ოპოზიციური სპექტრი".

"ოპოზიციის ეს ნაწილი, რომელსაც აქვს დაბალი მხარდაჭერა და ჰყავთ ძალიან მძიმე ბიოგრაფიის ლიდერები, რომლებიც საარჩევნო კამპანიას საზღვარგარეთ ატარებენ, მაღალი ალბათობით, ამ კვირაში ბოლოჯერ გაააქტიურებენ თავიანთ ლობისტურ კონტაქტებს და მაქსიმალურად ეცდებიან, რომ მიიღონ გარედან ისეთი ტიპის მხარდაჭერა, რომელიც შეიძლება შიდა მოლაპარაკებებში გამოადგეთ ამ მანდატებით ვაჭრობის პროცესში," - განაცხადა თალაკვაძემ.

ოპოზიციაზე საუბრისას თალაკვაძემ ასევე აღნიშნა, რომ ყველა ოპოზიციური პარტია ენმ-სა და "მისი განაყოფის" გარდა, აფასებს ხელისუფლების შეთავზებებს და პირობებს.

"ვხედავ რა ოპოზიციის ერთი, საკმაოდ მნიშვნელოვანი ნაწილის კონსტრუქციულ პოზიციებს და მათ შორის ჩვენი მხრიდან გადადგმული ნაბიჯები სახეზეა, მე იმედს ვიტოვებ, რომ შეთანხმება მოხდება."- ამბობს თალაკვაძე და დასძენს, რომ ენმ და "ევროპული საქართველო" შეეცდება როგორმე თავი აარიდონ შეთანხმებას:

"ოპოზიციის ეს ნაწილი, ვინც პასუხისმგებელია წარსულში უმძიმეს სისტემურ ჩავარდნებზე, დანაშაულებზე და პოლიტიკურ მანიპულაციებზე, მათ შორის არჩევნების გაყალბებაზე, ეს ადამიანები ცდილობენ ჩაშალონ დიალოგი. ის ვინც ჩაშლის ამ დიალოგს და შეთანხმებას, ვალდებული იქნება და მოუწევს აუხსნას ჩვენი საზოგადოებისთვის და დასავლელ პარტნიორებისთვის, თუ რა იყო რეალურად ის მოტივაცია, რის გამოც შეთანხმებას ხელი შეუშალეს. ახლა ოპოზიციის ეს ნაწილი დგას ტესტის წინაშე, სურთ თუ არა მათ რეალურად დემოკრატიული არჩევნები, თუ მათ სურთ, საარჩევნო ყუთის გვერდის ავლით ივაჭრონ საზოგადოების ინტერესებით, ხმებით და მანდატებით," - ამბობს თალაკვაძე.