პოლიტიკური პატიმრების გათავისუფლება, პოლიტიკური დევნის შეწყვეტა, არსებითად პროპორციული სისტემა, მანდატების 130/20-ზე განაწილების პრინციპი - ასეთია "გაერთიანებული ოპოზიციის" პასუხი ხელისუფლებას.

ევროპული საქართველოს ლიდერის, გიგა ბოკერიას, თქმით,თუ ჩამოთვლილი მოთხოვნები არ შესრულდება, ხელისუფლებასა და ოპოზიციას შორის შეთანხმება და ნორმალიზაცია ვერ მოხდება.

"ორივე კომპონენტი უნდა დაკმაყოფილდეს, რომ იყოს რაიმე შეთანხმება ევროპულ საქართველოსთან, ოღონდ იმ ილეთს, თუ "ტრიუკს", რაც უყვართ ხოლმე, რომ აი, რასაც ითხოვდნენ, იმას ხმას არ მისცემენ და გაიქცევიან მერე პარტნიორებთან და ეტყვიან, ნახე, რა უცნაური ხალხიაო, ხმას მივცემთ, რაც კარგი იქნება ქვეყნისთვის, იმას. პროპორციული არჩევნები რომ შემოიტანოს, ხმა არ უნდა მივცეთ?" - ამბობს გიგა ბოკერია.

რაც შეეხება ქართული ოცნების ახალ შეთავაზებას, ბოკერია მას "ბოდვა, იაფფასიანი ვირეშმაკობას" უწოდებს.

"მორალურად გატეხილები არიან და ცდილობენ, რომ აქ საზოგადოების ნაწილი მოატყუონ და გარეთ პარტნიორები, რომ რაღაც ქნეს, რა თქმა უნდა, არ მივცემთ ამის საშუალებას,"- უთხრა მედიას ბოკერიამ.

"არც 110/40-ზე, არც 120/30-ზე. რაც ვთქვით, მხოლოდ იმას მივცემთ ხმას,"- ამბობს ბოკერია.

ცნობისთვის, "ქართული ოცნების" ინოიციტივით, საარჩევნო სისტემაში ჩადებულია ე.წ ჩამკეტი ელემენტი, რაც პარტიას, რომელიც მიიღებს 40%-ს ან 40%-ზე ნაკლებს არჩევნებში, უკრძალავს პრაქტიკულ და თეორიულ შანსს, რომ დამოუკიდებლად შეკრას უმრავლესობა.