"ამერიკელებსა და ქართველებს ბევრი საერთო გვაქვს, დარწმუნებული ვარ, ჩვენი მეგობრობა დიდხანს გაგრძელდება"

"ამერიკელებსა და ქართველებს ბევრი საერთო გვაქვს, დარწმუნებული ვარ, ჩვენი მეგობრობა დიდხანს გაგრძელდება" - კელი დეგნანი

პოლიტიკა - 18:55, 28 Feb, 2020

1053

საქართველოში ამერიკის შეერთებული შტატების ელჩი კელი დეგნანი ვიდეომიმართვას ავრცელებს.

კელი დეგნანი მადლობას უხდის ქართულ სახელმწიფოს ასეთი გულწრფელი და თბილი მიღებისთვის. მან ხაზი გაუსვა ასევე ქართველებისა და ამერიკელების მრავალწლიან მეგობრობას და იმ პასუხისმგებლობას რაც მას აკისრია.
„ჩემთვის დიდი პატივია, ვიმსახურო ამერიკის შეერთებული შტატების ელჩად საქართველოში. მადლობას გიხდით თბილისში ჩამოსვლის დღიდან გულთბილი დახვედრისთვის. ყველა გულწრფელი და პოზიტიური გზავნილისთვის, რომელიც თქვენგან მივიღე ჩემს დანიშვნასთან დაკავშირებით. საქართველო ამერიკის მნიშვნელოვანი პარტნიორია და მე არ დავიშურებ ძალისხმევას, შევინარჩუნო არსებული მჭიდრო კავშირი და ვეძიო თანამშრომლობის ახალი არეალი ჩვენ ორ ქვეყანას შორის. თითქმის 30 წელია, რაც ამერიკა ამაყად დგას ქართველი ხალხის გვერდით. ჩვენ საქართველოს დავეხმარეთ დემოკრატიული ინსტიტუტებისა და სასამართლო სისტემის, ეკონომიკისა და უსაფრთხოების გაუმჯობესებაში, ჩვენ მხარს ვუჭერთ განათლებისა და ჯანდაცვის სისტემის ხარისხის განვითარებას, რათა ხელი შევუწყოთ ცხოვრების ხარისხის გაუმჯობესებას ყველა ქართველისთვის. კიდევ ბევრია გასაკეთებელი, მით უმეტეს ამ საარჩევნო წელს, რათა უზრუნველვყოთ ნამდვილად თავისუფლი და სამართლიანი არჩევნები ოქტომბერში“, – აცხადებს საქართველოში აშშ-ის ელჩი.
საუბრის ბოლოს ელჩმა საქართველოსა და ამერიკას შორის არსებულ მსგავსებებზე ისაუბრა და იმედი გამოთქვა, რომ მეგობრობა კიდევ დიდხანს გაგრძელდება.
"ჩემთვის მართლაც დიდი პატივია, გავუძღვე საელჩოს გუნდს და ვიმუშაო ქართველ მეგობრებთან ერთად, მშვიდობიანი და წარმატებული საქართველოსთვის. ამერიკელებსა და და ქართველებს ბევრი საერთო გვაქვს და დარწმუნებული ვარ, ჩვენი მეგობრობა დიდხანს გაგრძელდება. დიდი მადლობა“, – ამბობს ელჩი ვიდეომიმართვაში.