ხელისუფლების პასუხი ოპოზიციას: "ოცნება" 40%-იანი მხარდაჭერის პრინციპზე თანახმაა

პოლიტიკა - 17:48, 27 Feb, 2020

1094

საპარლამენტო უმრავლესობის ლიდერის, მამუკა მდინარაძის თქმით, “ქართული ოცნება” მზადაა “მოხსნას წუხილი” იმის თაობაზე, რომ 40%-ზე ნაკლები მხარდაჭერის მქონე ძალამ მთავრობა არ დააკომპლექტოს.

“ცალკე აღებულ რომელიმე მოდელზე – 110/40-ზე, 100/50-ზე და ა.შ. საუბარი არ ყოფილა, (ევროკავშირის ელჩთან გამართულ შეხვედრაზე) თუმცა ზოგად პრინციპებზე საუბარი იყო. შემიძლია დაგიდასტუროთ, რომ მმართველი გუნდი, “ქართული ოცნება” მზად არის, მოვხსნათ ის წუხილები, რომელიც შეეხება 40 პროცენტზე ქვევით მხარდაჭერის შემთხვევაში მთავრობის დაკომპლექტების შესაძლებლობას და ისეთ მექანიზმზე ვილაპარაკოთ, რომელიც ყველა ვარიანტში ამას გამორიცხავს. რასაც ისინი ამბობენ, თუ გამარჯვებულ გუნდს არ ექნება მინიმუმ 40%-ზე მაღალი შედეგი არჩევნებში, მაშინ შესაბამისი მექანიზმის (რაზეც შევთანხმდებით) მიხედვით, მთავრობას ვერ დააკომპლექტებს, ანუ არ ექნება 75 მანდატზე მეტი. ეს არის მთავარი პრინციპი...

ცალკე აღებულ 110/40-ზე ნუ ვისაუბრებთ, რადგან თუ დამატებითი კომპონენტები არ იქნა, არც 110/40 და არც ცოტა მეტი ან ნაკლები მაჟორიტარული სისტემით თუ პროპორციული სიით გასული დეპუტატი არ გულისხმობს მყარ გარანტიებს 40-პროცენტიან ზღვართან დაკავშირებით. ჩვენ თუ ვიტყვით, რომ ვთანხმდებით პრინციპზე, რომ თუ მმართველ გუნდს არ ექნა 40 პროცენტზე მეტი მხარდაჭერა არჩევნებში, ის ვერ დააკომპლექტებს მთავრობას, ეს არის ამოსავალი წერტილი. დანარჩენი ყველაფერი არის დეტალები”, - განაცხადა მამუკა მდინარაძემ.