ლევან იზორია და სოფიო ქაცარავა ელჩებად გაიგზავნებიან. იზორია გერმანიაში ახალი ელჩია, სოფიო ქაცარავა კი საქართველოს დიდ ბრიტანეთში წარმოადგენს. ანალიტიკოსებისა და ოპოზიციის შეფასებით დიპლომატიურ კარიერას "ქართული ოცნება" მისი ყოფილი წევრების გასაჩუმებლად და მოსასყიდად იყენებს. მათივე შეფასებით, იზორიას სხვა ქვეყანაში ელჩად გამწესების მიზანი, წინასაარჩევნოდ ოდიოზური ფიგურის ყოველდღიური პოლიტიკური ცხოვრებიდან მოშორებაც შეიძლება იყოს.

"იზორიას შემთხვევაში სახეზე გვაქვს ანტიგმირის შიდა პოლიტიკური პროცესისგან ჩამოშორება წინასაარჩევნოდ და გადასროლა სხვა ქვეყანაში.

ქაცარავას ხელისუფლებამ დაუფასა ალბათ ის რომ ხმამაღალი პოლიტიკური განცხადებები არ გაუკეთებია,წყნარად წავიდა. ეს ლოიალობა და ჩუმი სამზარეულოს პროტესტი დაუფასეს,"-აცხადებს გია ხუხაშვილი.

ნოდარ ხარშილაძის შეფასებით, ქაცარავას დიპლომატიური გამოცდილება აქვს, იზორიას კი საგარეო საკითხებზე ერთი დღეც არ უმუშავია. ხარშილაძე ფიქრობს, რომ იზორია საკმაოდ დიდი ინფორმაციის მატარებელია და მის განაწყენებას მმართველი გუნდის ლიდერი, ბიძინა ივანიშვილი მოერიდა.

"არ ჩათვალა მამა მარჩენალმა საჭიროდ, რომ გაეწირა, ერთადერთი კრიტერიუმი იზორიას დანიშვნის არის, ბიძინა ივანიშვილის სურვილი,"- აცხადებს ხარშილაძე.

ფაქტი კი ერთია, სოფიო ქაცარავას, რომელმაც მმართველი გუნდი პროპორციული საარჩევნო სისტემის ჩავარდნის გამო დატოვა, ახლა მოუწევს საერთაშორისო პარტნიორებს აუხსნას, რომ პროპორციული სისტემის ჩავარდნა არ ყოფილა მმართველი ძალის მხრიდან საზოგადოების მოტყუება.