ხმაურიანი სხდომა აჭარის ტელევიზიაში და ორი განსხვავებული აქცია შენობასთან - მოქალაეთა ნაწილი "კარგი ამბების" გაშუქებას ითხოვს

პოლიტიკა - 10:51, 19 Feb, 2020

1243

ხმაური აჭარის საზოგადოებრივი მაუწყებლის შენობასთან - ტელევიზიასთან მრჩეველთა საბჭოს სხდომის პარალელურად ორი აქცია იმართება. აქციის მონსწილეების ნაწილი მაუწყებლის თანამშრომლებს სოლიდარობას უცხადებს, ნაწილი კი აცხადებს, რომ აჭარის ტელევიზია და "კარგ ამბებს" არ აშუქებს.

რაც შეეხება აჭარის საზოგადოებრივი მაუწყებლის მრჩეველთა საბჭოში მიმდინარე პროცესებს, აქ საშტატო ცვლილებებს ხმაურის ფონზე განიხილავენ.

დაპირისპირების მიზეზი გახდა ჟურნალისტების მოთხოვნა, სტრუქტურულ ცვლილებებზე დღის წესრიგით გათვალისწინებული მესამე საკითხის შესახებ განცხადების გაკეთებასთან დაკავშირებით.

თუმცა მრჩეველთა საბჭოს თავმჯდომარე გიგა ჩხარტიშვილმა მათ სხდომის დასაწყისში განცხადების გაკეთების საშუალება არ მისცა, რასაც ხმაური და სიტყვიერი დაპირისპირება მოჰყვა.

სხდომას ტელევიზიის დირექტორიც ესწრება. გიორგი კოხრეიძე აცხადებს, რომ შექმნილი ვითარება ადამიანების ანგაჟირებულობამ გამოიწვია.

„სამი-ოთხი თვეა, საუბრობენ შიშებზე, საფრთხეებზე, თუმცა დღემდე არაფერი საშიში არ ხდება, არავის ემუქრება საფრთხე, ეს ყველაფერი გამოწვეულია იმით, რომ ადამიანები არიან ანგაჟირებულები“,-ამბობს გიორგი კოხრეიძე.

შესვენების შემდეგ ჟურნალისტებმა განცხადების გაკეთება მაინც მოახერხეს.

„ჩვენ გვინდოდა მოგვეწოდებინა, რომ სტრუქტურული ცვლილებების საკითხი გადაედოთ, რადგან ეს აზარალებს საზოგადოებრივ მაუწყებელს, ჰაერში რჩებიან ადამიანები და დირექტორის ნებაზეა დამოკიდებული, მათ სად გადაიყვანს. რა თქმა უნდა, სასამართლოს მივმართავთ და წელიწადნახევრის შემდეგ მაინც მივაღწევთ სიმართლის დადგენას“ ,- ამბობს ჟურნალისტი მალხაზ რეხვიაშვილი.

ჟურნალისტები არ გამორიცხავენ, სტრუქტურულ ცვლილებებზე გადაწყვეტილების მიღების შემთხვევაში, გაფიცვის ფორმას მიმართონ.