მინსკში გამართულ თბილისობაზე, კალაძე-ბახტაძის, საკრებულოს წევრებისა და მომღერლების მოლხენა 70 000 ლარი დაჯდა

პოლიტიკა - 10:17, 18 Feb, 2020

978

მინსკში ჩატარებული თბილისობისთვის “ხელოვანების” წაყვანა თითქმის 43,000 ლარი დაგვიჯდა - ამის შესახებ "ფლანგვის დეტექტორის" მიერ გავრცელებული განცხადებაშია ნათქვამი.
მათივე ინფორმაციით, მინსკში თბილისობის საზეიმოდ საკრებულოს თანამშრომლებიც იმყოფებოდნენ, რომელთა წასვლა 24,332 ლარი დაჯდა.
ორგანიზაციის ინფორმაციაში აღნიშნულია, რომ მინსკში წაყვანილ ხელოვანებში მოხვდნენ დათო გომართელი, ჯგუფი მგზავრები და სხვები.

"2019 წლის 23 აგვისტოს ბელარუსიის დედაქალაქ მინსკში “თბილისობა” გაიმართა, რომლის ფარგლებში ჩატარებულ ღონისძიებებს ოფიციალური ვიზიტით კახა კალაძე და მაშინდელი პრემიერმინისტრი მამუკა ბახტაძე დაესწრნენ.

“თბილისობის” ფარგლებში მინსკში კულტურული ღონისძიებები გაიმართა, რაშიც კონცერტები და სხვადასხვა დადგმები შედიოდა, რის გამოც ბელარუსიაში ქართველი ხელოვანები წაიყვანეს და ეს თბილისის მერიის სარეზერვო ფონდს 42,935 ლარი დაუჯდა.

წაყვანილ ხელოვანებში მოხვდნენ: დათო გომართელი, გიორგი ფუტკარაძე, ჯგუფი მგზავრები, ბენდი ირაო, ანსამბლი შვიდკაცა და სხვები.

“ადგილობრივი თვითმმართველი ერთეულის ბიუჯეტში გაუთვალისწინებელი გადასახდელების დასაფინანსებლად იქმნება სარეზერვო ფონდი, რომლის მოცულობა არ უნდა აღემატებოდეს წლიური ბიუჯეტით გათვალისწინებული ასიგნებების მთლიანი ოდენობის 2%-ს” - ეს არის განმარტება, თუ რისთვის შეიქმნა და რა არის სარეზერვო ფონდის მოვალეობა და მიუხედავად იმისა, რომ 2019 წელს მინსკში “თბილისობა” მეხუთედ ჩატარდა და ის გაუთვალისწინებელი ხარჯი სულაც არ ყოფილა, ხელოვანების წაყვანა მაინც სარეზერვო ფონდიდადნ დაფინანსდა.

ხელოვანებთან, მთავრობიდან და მერიიდან წასულ დელეგაციებთან ერთად, მინსკში საკრებულოს თანამშრომლებიც იმყოფებოდნენ. ესენი იყვნენ: საკრებულოს თავმჯდომარის მოადგილე ირაკლი ზარქუა, თამარ შურღაია, ვლადიმერ ძნელაძე, ბექა დავითულიანი, ლევან არველაძე, ავთანდილ ცინცაძე და გიორგი დოხტურიშვილი - მათი მინსკში “ზეიმი” მთლიანობაში 24,332 ლარი დაჯდა.

გარდა ამისა, 2019 წლის აგვისტო საკმაოდ დაძაბული პერიოდი იყო საქართველოს პოლიტიკურ ცხოვრებაში - სამოქალაქო საზოგადოება 20 ივნისის შემდეგ პარლამენტის წინ ყოველდღიურად აქციას მართავდა, ამის პარალელურად კი გავრცელდა ვიდეო, რომელიც 24 აგვისტოს მინსკში, თბილისობის მეორე დღეს არის გადაღებული და ჩანს, როგორ ერთობიან რესტორანში კახა კალაძე, ბექა ოდიშარია, დათო საგანელიძე, დავით გომართელი და სხვები.

გარდა მინსკისა, თბილისობა 2019 ცხადია, თბილისშიც ჩატარდა და ეს 2-დღიანი ღონისძიება მთლიანობაში 923,550 ლარი დაჯდა"- ნათქვამია "ფლანგვის დეტექტორის" მიერ გავრცელებულ განცხადებაში.