მიხეილ კალანდიას საქმის პროკურორის ინფორმაციით, კალანდიას წინააღმდეგ გარდა 3 მოწმის ჩვენებისა, სხვა მოწმეთა ჩვენებებიც აქვთ

პოლიტიკა - 20:12, 13 Feb, 2020

840

გარდა იმ სამი მოწმისა, რომელზეც დაცვის მხარე აპელირებს, ჩვენ მიერ წარმოდგენილია არაერთი სხვა მოწმე - ამის შესახებ დავით სარალიძის განზრახ მკვლელობაში ბრალდებული მიხეილ კალანდიას საქმის პროკურორი საუბრობს.

ბესიკ ქვარცხავა განმარტავს, რომ დღევანდელ სასამართლო სხდომაზე ბრალდების მხარემ საკუთარ დასკვნით სიტყვაში იმ მტკიცებულებებზე გაამახვილა ყურადღება, რომელიც მიხეილ კალანდიას წინააღმდეგ არსებობს.
„დასკვნით სიტყვაში მიმოვიხილეთ ყველა ის მტკიცებულება, რაც სასამართლო პროცესების მსვლელობისას მხარეთა მონაწილეობით იქნა გამოკვლეული. ეს ეხება მოწმეთა ჩვენებებს, კერძოდ, ჩვენს მიერ მიმოხილული იქნა დაახლოებით, 150-მდე მოწმის ჩვენება, ასევე ათეულობით ნივთიერი და ასეულობით წერილობითი მტკიცებულებები. გარდა იმ სამი მოწმისა, რომელზეც დაცვის მხარე აპელირებს, ჩვენ მიერ წარმოდგენილია არაერთი სხვა მოწმე გარდა მსჯავრდებულებისა, რომლებმაც დაადასტურეს საქმისათვის მნიშვნელობის მქონე ფაქტობრივი გარემოებები. ეს ეხება 51-ე საჯარო სკოლის წინ მყოფი ბრალდებულ მ.კ.-ს მოქმედებებს, იმ ფაქტს, თუ რა ეჭირა მას ხელში. ეს ეხება უშუალოდ დანის ტარს, ასევე უშუალოდ ხორავას ქუჩა ნომერ 4-ში განვითარებულ მოვლენებს. მოწმეებმა ისაუბრეს და დაადასტურეს, თუ რა მოქმედებებს ახორციელებდა უშუალოდ დანის მსგავსი საგნის გამოყენებით მ.კ. შემთხვევის ადგილზე. ასევე, დანაშაულის ჩადენის შემდეგ, ერთ-ერთ ეზოში რა ისაუბრა ბრალდებულმა მ.კ.-მ, თუ რა ჰქონდა მას ხელში. საერთო ჯამში, ეს მტკიცებულებები უნდა შეფასდეს და გვჯერა, რომ მას შემდეგ, რაც დაცვის მხარე წარმოადგენს დასკვნით სიტყვას, სასამართლო ერთობლიობაში შეაფასებს ყველა მტკიცებულებას და ერთადერთ, სამართლიან, კანონიერ და დასაბუთებულ გადაწყვეტილებას მიიღებს“, - განაცხადა ქვარცხავამ.