რუსეთის საინფორმაციო ტექნოლოგიებისა და მასობრივი კომუნიკაციების ზედამხედველობის ფედერალურმა სამსახურმა პოპულარულ ვებგვერდ Lurkmore.ru-ს (არაფორმალური ინტერნეტ-ენციკლოპედია რუსეთში) მოსთხოვა აიღოს ვებგვერდიდან ფერადკანიანი მამაკაცის გამოსახულება, რომელსაც უკან რუსეთის დროშა აქვს, მარჯვენა ხელში ხატი უჭირავს, ხოლო ე.წ. "გეორგიევსკის ლენტი" პენისზე აქვს შებმული.

როგორც "ლუკმორეს" ერთერთმა დამფუძნებელმა "ტელეგრამზე" დაწერა, "როსკომნადზორმა" ფოტოს გამოსახულება მოითხოვა, რადგან ის "შეურაცხყოფს საზოგადოებას, სახელმწიფოს, კონსტიტუციას, რუსეთის ოფიციალურ სახელმწიფო სიმბოლოებსა და ქვეყნის მეთაურს.

შეტყობინებაში, რომელიც საიტმა "როსკომნადზორიდან" მიიღო, ნათქვამია, რომ 10 თებერვალს, რუსეთის პროკურატურის მოთხოვნით, ეს გამოსახულება აკრძალული ინფორმაციის რეესტრში შევიდა. გენპროკურატურის განმარტებით, ფოტო შეურაცხყოფს "ადამიანურ ღირსებას და საზოგადოებრივ ღირებულებებს".

აღსანიშნავია, რომ შეტყობინების მიღებისა და გაფრთხილების მიუხედავად, ფოტო ჯერაც არის განთავსებული "ლუკმორეს" ვებგვერდზე.

შეგახსენებთ, "გეორგიევსკის ლენტი" იმპერიული რუსეთის სიმბოლოა და მას ჯვართან ერთად იმ სამხედრო პირებს გადასცემდნენ, ვინც განსაკუთრებით გამოიჩინა თავი დამპყრობლურ ომებში. მოგვიანებით ეს ლენტა დავიწყებას მიეცა, თუმცა, ისევ ამოტივტივდა მეორე მსოფლიო ომის დროს, ხოლო ვლადიმირ პუტინმა, მას ფაქტობრივად, სახელმწიფო სიმბოლოს მნიშვნელობა მიანიჭა.

საქართველოში "გეორგიევსკის ლენტებით" რუსი ტურისტების გადაადგილების გამო არაერთხელ მომხდარა მსუბუქი კონფლიქტი. საზოგადოების ნაწილი, მესამე სექტორის წარმომადგენელთა უმრავლესობასთან ერთად, მიიჩნევს, რომ ლენტის გამოყენებით ან ფასადზე/შენობაზე დამაგრებით ირღვევა "თავისუფლების ქარტია", რომლის მიხედვითაც საბჭოთა სიმბოლოების გამოყენება საჯარო თავშეყრის ადგილებში დასჯადი ქმედებაა. რამდენჯერმე იყო შემთხვევა, რომ ზემო ლარსის საკონტროლო-გამშვებ პუნქტზე ქართველმა მესაზღვრეებმა უკან გააბრუნეს რუსი მოტოციკლისტები, რომლებსაც "გეორგიევსკის ლენტა" ჰქონდათ შებმული.