ლეიბორისტული პარტიის ოფისში ოპოზიციური პარტიების შეხვედრა დაიწყო. ოპოზიციონერი ლიდერები სამომავლო გეგმებსა და მაჟორიტარობის საერთო კანდიდატებზე იმსჯელებენ. ევროპული საქართველოს ლიდერის, დავით ბაქრაძის თქმით, ხელისუფლებამ გიგი უგულავას დაპატიმრებით აღარ დატოვა სივრცე ნორმალური პოლიტიკური პროცესისთვის.

"ხელისუფლებამ აღარ დატოვა სივრცე დიალოგისთვის. ამიტომ, ბუნებრივია, რომ დასრულდა მოლაპარაკებები, სადაც ჩვენ ვიყავით განწყობილი ძალიან კონსტრუქციულად, რომ მოგვეძებნა გამოსავალი კრიზისიდან, რომელშიც ქართულმა ოცნებამ თავისი ტყუილით და გადაგდებით შეიყვანა ქვეყანა.

შესაბამისად, დღევანდელ შეხვედრაზე ვიმსჯელებთ, რა ნაბიჯები უნდა გადადგას ოპოზიციამ" - თქვა ბაქრაძემ და ასევე აღნიშნა, რომ ძალიან მნიშვნელოვანია ოპიზიციის ერთიანობა და პოლიტიკური ბრძოლის გაგრძელება.

"რაც შეეხება კონკრეტულ ინიციატივებს, შეხვედრის დასრულების შემდეგ, სულ ცოტა ხანში გაგაცნობთ - რაზე შევთანხმდებით. დანამდვილებით შემიძლია გითხრათ - ოპოზიცია არის ერთიანი, ბრძოლა გრძელდება, ხელისუფლებამ დააასრულა უგულავას დაჭერით ის დიალოგი, რომელიც მიმდინარეობდა საარჩევნო სისტემის შეცვლაზე" - ამბობს ევროპული საქართველოს ერთერთი ლიდერი და აღნიშნავს, რომ შეხვედრაზე ისაუბრებენ ყველაფერზე.

"მათ შორის, პირველ რიგში, მაჟორიტარობის საერთო კანდიდატებზე. ხელისუფლებამ უნდა იცოდეს - ნებისმიერ სისტემაში წააგებს არჩევნებს, აქეთ მიდის პროცესი, ამისთვის არსებობს მზადყოფნა ოპოზიციაში და სწორედ ამაზე გვექნება საუბარი ამ შეკრებაზე" - თქვა ბაქრაძემ.

შეგახსენებთ, რომ სახელისუფლებო ოპოზიციამ მმართველ პარტიასთან საარჩევნო სისტემაზე მოლაპარაკებები გიგი უგულავას დაპატიმრების გამო, 10 თებერვალს შეწყვიტა.

გიგი უგულავას უზენაესმა სასამართლომ დამატებით 3-წლიანი პატიმრობა მიუსაჯა საქმისთვის, რომელზეც სასჯელი მან ერთხელ უკვე მოიხადა - პროკურატურა უგულავას მისი მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.