ევროკავშირი მთავრობას საარჩევნო რეფორმის გატარებისკენ მოუწოდებს - "2020 წლის საპარლამენტო არჩევნები გადამწყვეტად მნიშვნელოვანი იქნება"

პოლიტიკა - 20:01, 07 Feb, 2020

1751

ევროკავშირი ყოველწლიურ ანგარიშს აქვეყნებს, სადაც მიმოხილულია საქართველოს მიერ ასოცირებული ხელშეკრულების გაფორმებით ნაკისრი ვალდებულებების შესრულების პროცესი, ქვეყანაში მიმდინარე რეფორმები, გამოთქმულია შეფასებები და კრიტიკული შენიშვნები ასოცირების პროცესის შემდგომი წარმატებით გაგრძელების მიზნით.
ანგარიში შეეხო 2019 წელს ქვეყანაში მიმდინარე ყველა მნიშვნელოვან მოვლენას, მათ შორის 20 ივნისის "გავრილოვის ღამეს" და შემდგომ საპროტესტო ტალღას. აღნიშნულია ისიც, რომ მმართველმა პარტიამ პოლიტიკური კრიზისის განეიტრალების მიზნით წინადადება შემოიტანა, რომლის მიხედვითაც სრულად პროპორციული არჩევნები უნდა ჩატარებულიყო უკვე 2020 წელს, 2024-ის ნაცვლად.
ანგარიშში აღნიშნულია 14 ნოემბერს კანონპროექტის ჩაგდების ფაქტიც და შემდგომი პოლიტიკური ჩიხი, რომელშიც სახელმწიფო აღმოჩნდა.

“2 სექტემბერს პრემიერ-მინისტრი მამუკა ბახტაძე თანამდებობიდან გადადგა და მის თანამდებობაზე შინაგან საქმეთა ყოფილი მინისტრი გიორგი გახარია დაინიშნა. „ქართული ოცნების“ შეთავაზებით 2020წლისთვის პარლამენტში მოსახვედრად გადასალახი ბარიერი ნულოვანი უნდა გამხდარიყო (დე ფაქტო მიღებული ხმების 0.67% ბარიერი) არსებული 3%-ის ნაცვლად. 14 ნოემბერს პარლამენტის კენჭისყრაზე საკონსტიტუციო ცვლილებების კანონპროექტის ჩავარდნამ შემდგომი პოლიტიკური არასტაბილურობა და ქუჩაში გამართული პროტესტები გამოიწვია. საარჩევნო რეფორმის პროცესი შეჩერებულია. ჩიხიდან გამოსასვლელი გზის მოსაძიებლად და არჩევნების წინ შემდგომი ნაბიჯების შესათანხმებლად პოლიტიკური დიალოგის შეხვედრები გაიმართა”, – ნათქვამია ანგარიშში.
ევროკავშირი საქართველოს მტავრობას საარჩევნო რეფორმების გაგრძელებისკენ მოუწოდებს, მათი თქმით 2020 წლის საპარლამენტო არჩევნები გადამწყვეტი იქნება საქართველოს დემოკრატიისთვის.
“დიდი მნიშვნელობა ექნება მზარდი პოლიტიკური პოლარიზაციის გასანეიტრალებლად ამბიციური საარჩევნო რეფორმების გატარებას და სასამართლო რეფორმის განხორციელებას. რაც შეეხება მომავლს, 2020 წლის შემოდგომაზე ჩასატარებელი საპარლამენტო არჩევნები გადამწყვეტად მნიშვნელოვანი იქნება საქართველოსთვის დემოკრატიისადმი ერთგულების დასადასტურებლად. მიმდინარე საარჩევნო რეფორმის ამოცანა უნდა იყოს 2018 წლის საპრეზიდენტო არჩევნების შემდეგ ეუთოს დემოკრატიული ინსტიტუტებისა და ადამიანის უფლებათა ოფისის(OSCE/ODIHR) მიერ შემოთავაზებულ ყველა რეკომენდაციასთან შესაბამისობა. ამავე დროს, ძალიან მნიშვნელოვანი იქნება ყველა მხარისათვის მისაღები გადაწყვეტილების პოვნა საარჩევნო სისტემასთან დაკავშირებით. გარდა ამისა, არჩევნების წინ თავისუფალი და პლურალისტული მედიისთვის ხელშემწყობი გარემოს არსებობა კიდევ ერთი გადამწყვეტი ფაქტორი იქნება”, – ნათქვამია ევროკავშირის ანგარიშში.