გიგი უგულავა მოსამართლე შალვა თადუმაძის აცილებას ითხოვს

პოლიტიკა - 11:23, 06 Feb, 2020

2015

ევროპული საქართველოს გენერალური მდივნის, გიგი უგულავას, მოსამართლე შალვა თადუმაძის აცილებას ითხოვს და შესაბამისი შუამდგომლობა უკვე დააყენა.

დეტალებთან დაკავშირებით ბექა ბასილაიამ უზენაეს სასამართლოსთან გამართულ ბრიფინგზე ისაუბრა და აცილების მიზეზად დაასახელა, რომ ამ საქმის საკასაციო საჩივრის მომზადების დროს უზენაეს სასამართლოში უვადოდ დანიშნული თადუმაძე გენერალური პროკურორი იყო.

"შალვა თადუმაძე გენერალური პროკურორობის დროს ფაქტობრივად ზედამხედველობას უწევდა საქმეს, რომელსაც დღეს იხილავს, როგორც უზენაესი სასამართლოს მოსამართლე. გიგი უგულავას წინააღმდეგ ფონდის საქმის მიმდინარეობისას სააპელაციო სასამართლოში და ასევე საკასაციო საჩივრის მომზადებისას, შალვა თადუმაძე იკავებდა გენერალური პროკურორის თანამდებობას და ნებისმიერი ობიექტური ტესტით ის ვერ იქნება მიუკერძოებელი მსაჯული უგულავას საქმის განხილვისას,"- აღნიშნა ბასილაიამ.

საქართველოს პროკურატურა უგულავას მერობის პერიოდში თბილისის განვითარების ფონდიდან 48 მილიონი ლარის მითვისება-გაფლანგვას ედავება.

შეგახსენებთ, რომ 2018 წელს თბილისის საქალაქო სასამართლომ უგულავას თბილისის განვითარების ფონდის საქმეზე 1 წლითა და 3 თვით თავისუფლების აღკვეთა შეუფარდა, თუმცა, სხვა საქმეზე გამოტანილმა განაჩენმა ახალი განაჩენი შთანთქა და როგორც საქალაქო სასამართლომ, ისე სააპელაციო სასამართლომ უგულავას სასჯელი მოხდილად ჩაუთვალა.

უზენაეს სასამართლოში საქმის განხილვა ოპოზიციის მწვავე პროტესტისა და აქცია-პიკეტების ფონზე განახლდა.

უგულავას დაცვის მხარე ეჭვობს, რომ 10 თებერვალს უზენაესი სასამართლო უგულავას თავისუფლების აღკვეთას მიუსჯის.