"ნაციონალური მოძრაობა" საპარლამენტო საქმიანობას ბოიკოტს უცხადებს - ამის შესახებ ფრაქცია "ნაციონალური მოძრაობის" თავმჯდომარემ, რომან გოცირიძემ სპეციალურ პრესკონფერენციაზე განაცხადა.

რომან გოცირიძე აცხადებს, რომ თავად "ქართულმა ოცნებამ“ აიძულა ნაციონალური მოძრაობა, რომ გამოიყენონ კანონით მინიჭებული უფლება ბოიკოტის შესახებ. მისი თქმით, „ქართული ოცნება“ ოპოზიციასთან საპარლამენტო დიალოგისთვის მზად არ არის.

„ხვალ იწყება პარლამენტის საგაზაფხულო სესია. ბუნებრივია, მინდა, საზოგადოებას ჩვენი გეგმების შესახებ მოვახსენო. ფრაქცია „ნაციონალური მოძრაობა“ არის ერთ-ერთი ყველაზე აქტიური ფრაქცია საპარლამენტო ცხოვრებაში როგორც საკანონმდებლო ინიციატივებით, ასევე საპარლამენტო ცხოვრების ყველა სფეროში. ჩვენი ფრაქცია მონდომებით გამოირჩევა, მაგრამ სამწუხაროდ, „ქართულმა ოცნებამ“ გვაიძულა, რომ გამოვიყენოთ კანონით მინიჭებული უფლება ბოიკოტის შესახებ. სამწუხაროდ, „ქართული ოცნება“ ოპოზიციასთან საპარლამენტო დიალოგისთვის მზად არ არის“, - განაცხადა გოცირიძემ.