"ევროსაბჭოს რეზოლუცია კიდევ ერთი მძიმე საერთაშორისო დარტყმაა ქართული ოცნებისთვის"

"ევროსაბჭოს რეზოლუცია კიდევ ერთი მძიმე საერთაშორისო დარტყმაა ქართული ოცნებისთვის" - ბაქრაძე

პოლიტიკა - 13:15, 31 Jan, 2020

987

"ევროპული საქართველოს" ლიდერი დავით ბაქრაძე ევროსაბჭოს საპარლამენტო ასამბლეის მიერ მიღებულ რეზოლუციას ეხმიანება, რომლის მიხედვითაც ჩვენი დასავლელი პარტნიორები დაჟინებით მოუწდებენ "ქართულ ოცნებას", მიიღოს ისეთი საარჩევნო სისტემა, რომელსაც ყველა მონაწილე მხარის ნდობა და მხარდაჭერა ექნება.

ბაქრაზე აღნიშნულ რეზოლუციას "ქართული ოცნებისადმი" კიდევ ერთ მძიმე დარტყმას უწოდებს.

"ამ რეზოლუციაში პირდაპირ არის გამოხატული ევროსაბჭოს დამოკიდებულება ქვეყანაში მიმდინარე მთავარი პროცესების მიმართ. მთავარი ჩანაწერი 2020 წლის არჩევნებს უკავშირდა, სადაც პირდაპირ წერია ევროსაბჭოს მოთხოვნა, შეიცვალოს სისტემა და შეიცვალოს ისე, რომ იყოს შეთანხმებული ოპოზიციასთანაც. ეს არის ძალიან მძიმე ჩანაწერი ქართული ოცნებისთვის და ტყუილად ნუ გაიხარებენ სიტყვა პროპორციულის ამოღებით," - ამბობს ბაქრაძე.

მისი თქმით, ძალიან მკაფიოა მოთხოვნა, რომ სისტემა უნდა შეიცვალოს და მისაღები გახდეს ოპოზიციისთვის.

"ეს არის კიდევ ერთი მძიმე საერთაშორისო დარტყმა ქართული ოცნებისთვის, რომელიც იძახის, რომ არაფრის შეცვლას აპირებს და ამ სისტემით გეგმავს არჩევნების ჩატარებას. ამიტომ, ევროსაბჭოს საპარლამენტო ასამბლეამაც თავისი პოზიცია გამოხატა.

ეს არის კიდევ ერთი საერთაშორისო ორგანიზაცია, სადაც ქართულ ოცნებას აქვს პრობლემა და აუცილებელია, ქართულმა ოცნებამ გადადგას ნაბიჯები სისტემის შესათანხმებლად. წინააღმდეგ შემთხვევაში ჩვენი ხელისუფლება ძალიან სწრაფად მოყვება სრული საერთაშორისო იზოლაციის პირობებში და უფრო მეტიც ეს რეზოლუცია ქმნის რეალურ საფუძველს, მოხდეს არჩევნების ლეგიტიმაციაზე კითხვის ნიშნების დასმა არჩევნების შემდეგ,"- განაცხადა დავით ბაქრაძე.