"განგაში: ოკუპანტები მიტაცებენ!" - დავით ქაცარავა მისივე იდეით შექმნილი "SOS ღილაკის" პრეზენტაციას გეგმავს

პოლიტიკა - 14:10, 28 Jan, 2020

2463

"ცნობილია, რომ საოკუპაციო ზოლზე ჩვენი მოქალაქეების უმრავლესობას რუსი ოკუპანტები ქართული მხარის მიერ კონტროლირებადი ტერიტორიიდან იტაცებენ, ეს მოწყობილობა კი, ღილაკზე დაჭერის შემდეგ, თუნდაც ოკუპანტებმა ის დაამტვრიონ კიდეც, მაინც აგზავნის ზუსტ ადგილსამყოფელს, ამასთან, თუ ოფიციალური სტრუქტურები მიუერთდებიან ამ პროგრამას, გატაცებაზე ინფორმაციას მცდელობისთანავე მიიღებენ.
მოწყობილობები დაურიგდება საოკუპაციო ზოლზე მცხოვრებ იმ მოქალაქეებს, რომლებსაც ხშირად უწევთ სახლიდან გასვლა და იმ ტერიტორიაზე ყოფნა, სადაც საოკუპაციო ზოლს ოკუპანტები მათივე ნება-სურვილით ცვლიან", - დავით ქაცარავას იდეამ, დამზადებულიყო ერთგვარი "SOS ღილაკი", გაგრძელება ჰპოვა და მისმა მეგობრებმა მართლაც დაამზადეს პატარა მოწყობილობა, რომელიც ინტერნეტის დაფარვის ზონაში მფლობელის გადაადგილების მარშრუტს ადგენს და სათანადო ბაზაში აგზავნის.

მაგალითად, მწყემსს ან ტყეში ჯონჯოლის საკრეფად წასულ ადგილობრივს ეს მოწყობილობა, რომელიც მანქანის სიგნალიზაციის პულტზე ოდნავ დიდია, ჯიბეში უდევს და ოკუპანტები გამოჩნდნენ, რომლებიც მის გატაცებას აპირებდნენ. მოქალაქე ჯიბეში ხელს იდებს და პულტის ღილაკზე აჭერს ხელს - ეს შეუძლია შეუმჩნევლად გააკეთოს, თუმცა, იმ შემთხვევაშიც კი, თუ მოწყობილობას ოკუპანტები შეამჩნევენ და გაანადგურებენ, ის ბაზაში განახლებად რეჟიმში აგზავნის გადაადგილების მარშრუტს და დამტვრევამდე რამდენიმე წამით ადრე დაფიქსირებული ადგილიც იქნება მითითებული.
ამ მოწყობილობის გარდა დავით ქაცარავა და მისი თანამოაზრეები პრეზენტაციაზე წარმოადგენენ ექსკლუზიურ მასალას, რითაც დასტურდება, რომ მიმდინარეობს ახალი ტერიტორიების მიტაცება ოკუპანტების მხრიდან, საქართველოს ხელისუფლება კი სდუმს და ანტიოკუპაციური მოძრაობის წარმომადგენლებს საოკუპაციო ზოლზე გადაადგილებას უზღუდავს.
პრეზენტაცია საქართველოს პარლამენტის ეროვნულ ბიბლიოთეკაში (გუდიაშვილის 7), 31 იანვარს, 19 საათზეა დაგეგმილი და იგი ღიაა დასწრების ნებისმიერი მსურველისთვის.