ხაბეიშვილი არ გამორიცხავს, რომ ბრალი წაუყენონ - "დაიწყო მოთქმა, რომ ირაკლი ზარქუა დამითეთქვია"

პოლიტიკა - 13:53, 28 Jan, 2020

1479

„ქართული ოცნების“ დეპუტატების მიერ ნაცემი საკრებულოს ოპოზიციონერი დეპუტატი, ლევან ხაბეიშვილი არ გამორიცხავს, რომ საკრებულოში მომხდარ დაპირისპირების გამო ბრალი არა ძალადობაში იდენტიფიცირებულ პირებს, არამედ მას წაუყენონ.

„ნიუპოსტთან“ საუბრისას ხაბეიშვილი კიდევ ერთხელ ამბობს, რომ მას ჯგუფურად დედაქალაქის მერის, კახი კალაძის დავალებით გაუსწორდნენ.

„ეს ადამიანები ჯგუფურად, ორგანიზებულად დამესხნენ თავს კალაძის დავალებით. ეს მოხდა შინაგან საქმეთა მინისტრთან ვახტანგ გომალაურთან შეთანხმებით. ეს კადრები ყველამ პირდაპირ ეთერში ნახეთ, თუმცა იმდენად გაუკუღმართებულ ქვეყანაში ვცხოვრობთ, რომ ნამდვილად არ გამოვრიცხავ, რომ ბრალი პირიქით მე წამიყენონ. ყველაფერი აქეთკენ მიდის. დაიწყო მოთქმა, რომ ირაკლი ზარქუა დამითეთქვია.

ამათგან არაფერია გასაკვირი. აგერ უგულავას მოჭიდავე დაესხა თავს და იმის ნაცვლად, რომ მოძალადე დაეკავებინათ, ოპოზიციის წარმომადგენელს წაუყენეს ბრალი“- თქვა ხაბეიშვილმა.

"ოცნების" დეპუტატები ლევან ხაბეიშვილს პარასკევს, 24 იანვარს თბილისის საკრებულოში დაესხნენ თავს. მას რამდენიმე პირმა მიაყენა ფიზიკური შეურაცხყოფა. შსს-მ ხაბეიშვილის ცემაზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.