„დამოუკიდებელ ექსპერტთა ასოციაციის“ ხელმძღვანელმა - გელა კვაჭანტირაძემ გააკეთა განცხადება ქვეყანაში შექმნილ პოლიტიკურ სიტუაციასთან დაკავშირებით:

„ევროპარლამენტის საგარეო ურთიერთობათა კომიტეტის ახლახან გამართულ სხდომაზე, რომელიც დაეთმო საქართველოში შექმნილი სიტუაციის განხილვას, კიდევ უფრო ნათლად გამოჩნდა, რომ ჩვენს ქვეყანაში შექმნილი საგანგაშო სურათი უკვე ყველასთვის კარგადაა ცნობილი და ამის გამო არა მხოლოდ ევროპარლამენტარები, არამედ მთელი საერთაშორისო დემოკრატიული სამყარო გამოთქვამს წუხილს და ღრმა შეშფოთებას.

არ წყდება ამერიკელი კონგრესმენების, ევროპის დემოკრატიული ქვეყნების ლიდერების მიმართვები და მოწოდებები საქართველოს ხელისუფლებისადმი, რომ საქართველო კვლავ დაუბრუნდეს განვითარების ნორმალურ, დემოკრატიულ გზას. უკვე ყველასთვის ნათელი გახდა, რომ საქართველოში, რომელიც ერთ დროს აღიარებული იყო, როგორც რეგიონის ყველაზე უფრო წარმატებული რეფორმების ქვეყანა, ახლა მთელი ძალაუფლება ხელთ უპყრია ერთ ადამიანს - ჩრდილოვან მმართველს ბიძინა ივანიშვილს და ხელისუფლების ყველა შტო მხოლოდ მისი სურვილების უპირობო შემსრულებელია. საქმე იქამდეც კი მივიდა, რომ აშშ-ის თავდაცვის მდივნის ყოფილმა მოადგილემ რუსეთის, უკრაინის და ევრაზიის საკითხებში, ეველინ ფარკასმა CNN -ზე, რუსეთში მიმდინარე მოვლენებზე საუბრისას ვლადიმერ პუტინის მომავალი გეგმები საქართველოს ჩრდილოვანი მმართველის, ოლიგარქ ივანიშვილის პოზიციას შეადარა.

საქართველოს ხელისუფლება სამწუხაროდ კვლავაც აგრძელებს საერთაშორისო თანამეგობრობის შეშფოთების და მოწოდებების იგნორირებას და სხვადასხვა საბაბით აჭიანურებს დაპირებულ სამართლიან საარჩევნო სისტემაზე გადასვლას, რითაც ძაბავს სიტუაციას ქვეყნის შიგნით და კიდევ უფრო დაბლა სწევს ქვეყნის საერთაშორისო ავტორიტეტს.

„დამოუკიდებელ ექსპერტთა ასოციაციას“ მიაჩნია, რომ ხელისუფლების ასეთი არაკომპეტენტური პოლიტიკა ქვეყანას მიაქანებს საერთაშორისო იზოლაციისკენ. ჩვენ სულ უფრო სწრაფად ვუახლოვდებით იმ საშიშ ზღვარს, როცა რეალური საფრთე ექმნება ქვეყნის როგორც პოლიტიკურ, ისე ეკონომიკურ და სოციალურ სტაბილურობას. მიგვაჩნია, რომ დადგა დრო, როცა მთელმა ქართულმა საზოგადოებამ ხმა უნდა აიმაღლოს და მხარი დაუჭიროს სამართლიანი საარჩევნო სისტემის დაუყონებლივ მიღებას, რათა ქვეყანამ თავიდან აიცილოს ის დიდი და ძალიან საშიში რისკები, რომელიც გვიქადის კვლავ 90 -იანი წლების ქაოსში და უმძიმეს სოციალურ-ეკონომიკურ მდგომარეობაში დაბრუნებას.“