საქართველოს იუსტიციის მინისტრმა, თეა წულუკიანმა ადამიანის უფლებათა კომიტეტის სხდომაზე გამოსვლისას N8 პენიტენციურ დაწესებულებაზე ისაუბრა.

„მერვე დაწესებულებაში ბრძანდებოდით სახალხო დამცველის წარმომადგენლები და ისე როგორ გამოხვედით იქიდან, ვერ დაინახეთ, რომ პატიმრები შრომობენ დიგიტალიზაციის პროექტზე. იქ, სადაც იყო წამების ციტადელი, გავაშენე ბოსტანი, ზოგს ეცინება, წამების ადგილას ბოსტანი რამ გაგაშენებინაო, დიახ, ჩვენ გავაშენეთ ბოსტანი და ამ ბოსტანში მუშაობენ უვადო პატიმრები, რომლებიც თქვენ მაინცდამაინც არ გადარდებენ. 73 უვადო პატიმარია ქვეყანაში და ჩემი ვალია, ამ რიცხვის შემცირებაზე ვიზრუნო, არ ვგულისხმობ გათავისუფლებას. როგორ? კარგი იქნებოდა, ამაზე სახალხო დამცველს ჩემთან ერთად ემუშავა, მაგრამ ჯერჯერობით ამგვარი რამ არ ჩანს, პირიქით, არაერთი უვადო პატიმარი თქვენთან ითხოვს შეხვედრას, მაგრამ თქვენ მათ არ შეხვედრიხართ, შეხვდით.

გლდანის დაწესებულება დიდი ინფრასტრუქტურაა და ძალიან ცუდი სამართავია, რადგან ინფრასტრუქტურა ძალიან ცუდად არის მოწყობილი. ეს თქვენ კარგად იცით, ამას მე ვერ შემრაცხავთ, რადგან ეს არ არის ჩემი ბრალი. გლდანის დაწესებულებაზე პენიტენციურმა სამსახურმა დეტალურად მოგწერათ, თუ რატომ არის ზოგიერთი ადგილი გარემონტებული და ზოგი გაურემონტებელი. დღეს გლდანში არის 2600 პატიმარი. იმდენი პატიმარი, რამდენიც არის მთლიანად ლატვიაში, არის მხოლოდ გლდანში. ეს არის კრიტიკულად დიდი ინფრასტრუქტურა, თან დახურული ციხეა და რაკი სხვა ინფრასტრუქტურა არ დამხვდა, როდესაც ეს სისტემა შევიერთე, ამ პატიმრებს მე სახლში ვერ წავიყვან, თქვენც ვერ წაიყვანთ ალბათ, შესაბამისად, ეს პატიმრები სადღაც უნდა იყვნენ. თუ პატიმარი საკანშია, იმ საკანს ვერ გაარემონტებ, ამიტომ ხდება ფლიგელ-ფლიგელ დაწესებულების გამოთავისუფლება, იმ ფლიგელის გარემონტება, მერე უკან შეყვანა და ასე შემდეგ, რათა პრობლემა, რომელიც დაგვხვდა, აღმოვფხვრათ, თუნდაც მწერების პრობლემა. ასევე, ეს დახურული ციხეა და კარგი იქნება, ჰქონდეს ქვეყანას ფუფუნება, 2600 პატიმარი გაიყვანოს, გაარემონტოს და უკან შემოიყვანოს, მაგრამ ამის ფუფუნება დღეს ჩვენ არ გვაქვს.

მე ვიყავი პირველი მინისტრი, რადგან იმ მთავრობას წარმოვადგენ, რომელიც კარგად თუ დაუკვირდებით, ძალიან გაბედული მთავრობაა, პირველად მე შარშან, მაღალი ტრიბუნიდან ვთქვი, რომ ზონები უნდა დაიკეტოს. ეს არ თქმულა მანამდე, ეს ძალიან გაბედული განცხადებაა მრავალ ჭრილში, ძალიან კარგად მესმის, მაგრამ ზონები უნდა დაიკეტოს, ამისთვის საჭიროა ახალი ციხეები“, - განაცხადა იუსტიციის მინისტრმა.