"არც გამომძიებელმა მიპასუხა, არც ოფიცერმა, ტელეფონს თიშავდნენ" - 15 წლის ბიჭის ოჯახი პოლიციელებს დანაშაულში ამხელს

კრიმინალი - 10:33, 21 Jan, 2020

3177

შსს ახალ სკანდალში ეხვევა - 15 წლის მოზარდის ოჯახი ირწმუნება, რომ არასრულწლოვანი პოლიციის სამმართველოს შენობაში მთელი ღამის განმავლობაში, კანონიერი წარმომადგენლის გარეშე იმყოფებოდა.
მოზარდის შესახებ ინფორმაცია ოჯახის წევრებს არ ჰქონდათ.

არასრულწლოვანი დედა აცხადებს, რომ გუშინ პოლიციიდან დაუკავშირდნენ და უთხრეს, რომ მისი შვილი ტელეფონის ქურდობის ბრალდებით წინასწარი დაკავების იზოლატორში იყო გადაყვანილი.
მოზარდის მშოვლები მთელი ღამე მთავარ სამმართველოსთან იყვნენ, თუმცა არც მათ და არც ადვოკატს სამართალდამცველებმა ბავშვის მონახულების საშუალება არ მისცეს.

"არ ვიცი დაკავების დრო, რა დროს დააკავეს, მითხრეს მობრძანდით თქვენი შვილი დავაკავეთო. მოვედი და დაგვირეკა, რომ ხვალ მობრძანდითო, გამომძიებელმა დამირეკა და იგივე განმიცხადა. ვრეკავდი და არც გამომძიებელმა მიპასუხა, არც ოფიცერმა. ადვოკატმაც დაურეკა და ტელეფონი გაუთიშეს" - აცხადებს მოზარდის დედა.
"ნიუპოსტი" შინაგან საქმეთა სამინისტროს დაუკავშირდა, სადაც აღნიშნავენ, რომ "პოლიციამ, დანაშაულის ჩადენის ფაქტზე, გადაუდებელი აუცილებლობის შემთხვევაში დააკავა არასრულწლოვანი".
"დაკავების შესახებ ეცნობა მის კანონიერ წარმომადგენელს. არასრულწლოვანთან დაკავების შემდეგ რაიმე სახის საგამოძიებო მოქმედება არ ჩატარებულა.

მოზარდი დაკავების შემდეგ შესახლებულ იქნა დროებითი მოთავსების იზოლატორში.

ქურდობის ფაქტზე გამოძიება სისხლის სამართლის კოდექსის 177-ე მუხლით მიმდინარეობს"- აცხადებენ უწყებაში.