აშშ-ის ელჩის მოვალეობის შემსრულებელი კონგრესმენები კტირიკულ წერილზე: "ახლა არის ძალიან მნიშვნელოვანი მომენტი საქართველოს დემოკრატიულ გზაზე"

პოლიტიკა - 14:51, 20 Jan, 2020

1133

ამერიკის შეერთებული შტატების ელჩის მოვალეობის შემსრულებელი ელისაბეთ რუდი „რესპუბლიკელი“ კონგრესმენის, მარკუეინ მალინის უმწვავეს წერილზე კომენტარს აკეთებს.

მისი თქმით, საქართველომ ძალიან დიდ პროგრესს მიაღწია, თუმცა ახლა არის ძალიან მნიშვნელოვანი მომენტი საქართველოს დემოკრატიის გზაზე.

„კონგრესმენები წარმოადგენენ ამერიკის საკანონმდებლო შტოს და დეტალები სჯობს მათ ჰკითხოთ. რაც შემეხება მე, როგორც აღმასრულებელი შტოს წარმომადგენელს, უნდა აღვნიშნო ის ძალიან დიდი პროგრესი, რასაც საქართველომ მიაღწია. ახლა არის ძალიან მნიშვნელოვანი მომენტი საქართველოს დემოკრატიულ გზაზე, ვგულისხმობ იმ პოლიტიკურ დიალოგს, რომელიც მიმდინარეობს ევროკავშირის, ევროსაბჭოს, ამერიკის შეერთებული შტატების მხარდაჭერით და წარმოადგენს ძალიან კარგ შესაძლებლობას მმართველი გუნდისა და ოპოზიციური პარტიებისთვის, რომ მიაღწიონ შეთანხმებას, წავიდნენ გარკვეულ დათმობაზე და მიიღონ საუკეთესო მოდელი ქვეყნის განვითარებისთვის. ასევე, მსურს ვახსენო, რომ მნიშვნელოვანია საარჩევნო რეფორმისა და კანონმდებლობის მიღება, რომელიც გაითვალისწინებს ეუთო/ოდირის რეკომენდაციებს. ასევე მნიშვნელოვანია, რომ ქვეყანაში ნებისმიერი საგამოძიებო პროცესი, ბრალება თუ სასამართლო პროცესი იყოს თავისუფალი პოლიტიკური გავლენებისგან, რადგანაც ეს კიდევ უფრო გააძლიერებს ადამიანის უფლებათა დაცვას და საქართველოს დემოკრატიას. შესაბამისად, ხელს შეუწყობს უფრო მიმზიდველი საინვესტიციო კლიმატის შექმნას ქვეყნისთვის და ამავდროულად, გააძლიერებს იმ ღირებულებებს, რაც არის საფუძველი საქართველო-ამერიკის სტრატეგიული პარტნიორობისთვის", - განაცხადა რუდმა.