რომელ პოლიტიკოსებს აქვთ ყველაზე მაღალი რეიტინგი

რომელ პოლიტიკოსებს აქვთ ყველაზე მაღალი რეიტინგი - NDI-ის კვლევა

პოლიტიკა - 12:41, 16 Jan, 2020

2262

NDI-ის ახალი კვლევის მიხედვით, გამოკითხულთა 34-34%-ს პოლიტიკოსებიდან დადებითი დამოკიდებულება დავით ბაქრაძის და კახა კალაძის მიმართ აქვთ.

კალაძის მიმართ უარყოფით დამოკიდებულებას გამოკითხულთა 22% აფიქსირებს.

დავით ბაქრაძის მიმართ კი, 21%-მა. კალაძის შემთხვევაში 36% ამბობს, რომ მის მიმართ არც დადებითი და არც უარყოფითი დამოკიდებულება არ აქვს, 4% აღნიშნავს, რომ არ სმენია მის შესახებ, 5% ამბობს, რომ არ იცის დადებითი დამოკიდებულება აქვს მის მიმართ თუ უარყოფითი. კვლევის თანახმად, დავით ბაქრაძის მიმართ 35%-ს არ აქვს არც დადებითი და არც უარყოფითი დამოკიდებულება, 5% ამბობს, რომ არ სმენია მის შესახებ, 5% ასევე აღნიშნავს, რომ არ იცის დადებითი დამოკიდებულება აქვს თუ უარყოფითი.

გამოკითხვის თანახმად, შალვა ნათელაშვილს დადებითად გამოკითხულთა 29% აფასებს, უარყოფითად - 25%, 36% ამბობს, რომ მის მიმართ არც დადებითი და არც უარყოფითი დამოკიდებულება არ გააჩნია, 5% ამბობს, რომ არ სმენია მის შესახებ, 5% პასუხად კითხვაზე ამბობს, რომ არ იცის როგორი დამოკიდებულება აქვს.

გამოკითხულთა 20% აფასებს დადებითად ალეკო ელისაშვილს და ასევე, 20% უარყოფითად.

პრემიერ-მინისტრის, გიორგი გახარიას მიმართ დადებითი დამოკიდებულება გამოკითხულთა 27% -ს აქვს, პრემიერს უარყოფითად 34% აფასებს. 30%აცხადებს, რომ არც დადებითი და არც უარყოფითი დამოკიდებულება არ გააჩნია, 5% აღნიშნავს, რომ არ სმენია მის შესახებ, 4% კი კითხვაზე დადებითი დამოკიდებულება აქვთ მის მიმართ თუ უარყოფითი პასუხობს, რომ არ იცის.

კვლევის საველე სამუშაოები 2019 წლის 19 ნოემბერი-13 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით) ჩატარდა. სულ პირისპირ ინტერვიუს წარმომადგენლობითი შერჩევის საფუძველზე 2 180 პირი გამოკითხეს.