15 სამართალდამცველი გიორგი რურუას წინააღმდეგ - "მთავარი არხის" მეწილეს დე-ენ-ემი-ს ნიმუში აუღეს

პოლიტიკა - 15:20, 15 Jan, 2020

1301

"მთავარი არხის" მეწილეს დე-ენ-ემი-ს ნიმუში აუღეს.გამომძიებელი კახაბერ მურადაშვილი აცხადებს, რომ გლდანის ციხეში, გიორგი რურუასთვის დნმ-ის აღება ნებაყოფლობით მოხდა. როგორც მან ჟურნალისტებს განუცხადა, დნმ-ის ნიმუში სასამართლოს განჩინების საფუძველზე აიღეს.

„ნიმუში გაიგზავნება საექსპერტო ბიუროში და შედარდება მისი ჩხრეკის შედეგად ამოღებულ ცეცხლსასროლ იარაღზე არსებულ დნმ-ის ნიმუშზე. ამ შემთხვევაში, სასამართლო განჩინება შეასრულა გიორგი რურუამ და მისგან ნებაყოფლობით მოხდა ნიმუშის აღება. რაც შეეხება ჩხრეკას, ჩხრეკა ჩატარდა კანონის სრული დაცვით. ჩატარდა მისი პირადი და ავტომანქანის ჩხრეკა მაშინ, როცა მოხდა მისი დაკავება და ამოღებულ იქნა ცეცხლსასროლი იარაღი, რაც ვარგისია სროლისათვის“, - განაცხადა გამომძიებელმა.

დაკავებულის ადვოკატების თქმით კი ადგილზე ისეთი ვითარება შეიქმნა, უკეთესი იქნებოდა გიორგი რურუას საგამოძიებო პროცესში მონაწილეობა მიეღო.

"აღებულ იქნა ახალი განჩინება მოსამართლის ამ ნიმუშის აღებაზე და განჩინებაში რა თქმა უნდა მითითებული იყო პროპორციული ძალის გამოყენების უფლება მიეცა პოლიციასაც და გამოძიებას, მაგრამ იმავდროულად ამ სასჯელაღსრულების დაწესებულებასაც მიეცა უფლება საჭიროების შემთხვევაში კონტინგენტიც დაეხმარებინა პროპორციული ძალისთვის.

შემოსული იყო დაახლოებით 10-15 პოლიციელი და რა თქმა უნდა სასჯელაღსრულების დაწესებულების თანამშრომლებიც მზად იყვნენ.

არავითარი გონივრულობა არ იქნებოდა ჩვენის მხრიდან აქ ჭიდაობის დაწყება და წინააღმდეგობის გაწევა. განჩინების შესაბამისად გიორგი რურუამ მისცა ნიმუში, თუმცა რა თქმა უნდა ოქმში დავაფიქსირეთ ყველაფერი ის უკანონობა, რაც უკვე ჩადენილია," - თქვა შალვა შავგულიძემ.