გიორგი გახარიას მიერ შესაძლო პოსტის დატოვება - ოპოზიციაში ამბობენ, რომ ივანიშვილი გუნდს კარგავს

პოლიტიკა - 13:10, 10 Jan, 2020

3303

გავრცელებულ ინფორმაციას იმის შესახებ, რომ პრემიერ-მინისტრმა გახარიამ შესაძლოა, პოსტი დატოვოს ოპოზიციაში ეხმაურებიან.

ხელისუფლების ოპონენტები აცხადებენ, რომ ივანიშვილის გუნდი კიდევ უფრო სუსტდება.

"ერთიანი ნაციონალური მოძრაობის" ერთ-ერთი ლიდერის, ზურაბ მელიქიშვილი ამბობს, რომ როგორც ყოფილი, ისე მოქმედი პრემიერი რუსეთის ინტერესებს ატარებენ და თუ გახარია პოსტს დატოვებს, ეს ხალხის მოთხოვნის გათვალისწინებით არ იქნება ნაკარნახები.

"ეტყობა რაღაც მას აღარ მოსწონს მასში და სწორედ ამიტომ განახორციელა და არა იმიტომ, რომ ეს არის ქართველი ალხის მოთხოვნა გავრილოვის ღამის შემქმნელების დასჯასთან დაკავშირებით. ორივე მათგანი არიან ჩვეულებრივი რუსული ინტერესების განმახორციელებლები",-აცხადებს ზურაბ მელიქიშვილი.

"ევროპული საქართველოს" ერთ-ერთი ლიდერი, სერგო რატიანი აღნიშნავს, რომ ბოლო 6 თვის განმავლობაში ივანიშვილმა დაკარგა პრაქტიკულად ნახევარი გუნდი.

"ბოლო 6 თვის განმავლობაში ივანიშვილმა დაკარგა პრაქტიკულად ნახევარი გუნდი. ყველა პოლიტიკური ფიგურა, სპიკერი ვინც ჰყავდა, მას ეკარგება. მიზეზი არის ის, რომ ან მას უჭირს ამა თუ იმ ფიგურის შენარჩუნება და ის იძულებულია გაწიროს ის ფიგურები, ან მას ტოვებენ ადამიანები, რომლებსაც აქვთ გარკვეული რეპუტაცია",-აცხადებს ევროპული საქართველოს წევრი, სერგო რატიანი.