ოკუპირებული აფხაზეთის ე.წ. დეპუტატებმა დადგენილების პროექტი მიიღეს, რომლითაც დე ფაქტო პრეზიდენტს, რაულ ხაჯიმბას პოსტის ვადაზე ადრე დატოვებისკენ მოუწოდეს.

დადგენილებას ცხრამეტმა ე.წ. დეპუტატმა დაუჭირა მხარი, დადგენილების მოწინააღმდეგე კი ოთხი დეპუტატი იყო.

ოპოზიციის მხარდამჭერები მთელი ღამის განმავლობაში ე.წ. პრეზიდენტის ადმინისტრაციის შენობასთან იყვნენ მობილიზებულები. ოპოზიცია აცხადებს, რომ ისინი იქამდე არ დაიშლებიან, სანამ რაულ ხაჯიმბა არ გადადგება. თავად ხაჯიმბა კი მიიჩნევს, რომ ე.წ. პარლამენტის დადგენილების პროექტმა, შესაძლოა, ვითარება კიდევ უფრო გაამწვავოს.

ცნობისთვის, გუშინ ოკუპირებულ აფხაზეთში ოპოზიციური პარტია „ამცახარას“ მხარდამჭერები დე ფაქტო პრეზიდენტის ადმინისტრაციაში შეიჭრნენ. თავად დე ფაქტო პრეზიდენტმა კი ადმინისტრაციის შენობა დატოვა.

ისინი, არ ცნობენ, საარჩევნო კომისიის შედეგებს, რომლის თანახმადაც, დე ფაქტო არჩევნებში გამარჯვება რაულ ხაჯიმბამ მოიპოვა.