ოპოზიცია პიკეტირებებისა და აქციების რეჟიმში გადადის

ოპოზიცია პიკეტირებებისა და აქციების რეჟიმში გადადის - ივანიშვილს ცხელი დღეები ელის

პოლიტიკა - 19:12, 09 Jan, 2020

1353

"ლეიბორისტული პარტიის" ოფისში ოპოზიციის დახურული შეხვედრა დასრულდა. ხელისუფლების ოპონენტების განხილვის მთავარი თემა საარჩევნო სისტემა და არჩევნების გაყალბების თავიდან აცილება იყო.
ოპოზიცია საარჩევნო სიების გადამოწმებას ითხოვს, რადგან მათ აქვთ ეჭვი, რომ ხელისუფლება 2020 წლის არჩევნების გასაყალბებლად ემზადება.
ოპოზიციონერმა პოლიტიკოსებმა შეხვედრაზე სამოქმედო გეგმები დასახეს. დაიგეგმა ორი მასშტაბური აქცია, რომელიც იანვრის თვეში რეგიონებში გაიმართება. ასევე მათ დააანონსეს, რომ ოთხ თებერვალს, სესიის გახსნის დღეს დაგეგმილია პიკეტირება და ამ რეჟიმში გააგრძელებენ ისინი მოქმედებას.ამას გარდა ოპოზიცია განაგრძობს სანქციების სიაზე მუშაობა ოპოზიციონერი პოლიტიკოსები აცხადებენ, რომ ისინი ელოდებიან საერთაშორისო ექსპერტების დასკვნას ე.წ გერმანული მოდელის კონსტიტუციასთან შესაბამისობასთან დაკავშირებით.
"შევთანხმდით სიაზე, რომელსაც აქამდე სანქციების სიად მოვიხსენიებდით, მას უნდა ეწოდოს 20 ივნისის სანქციების სისა, რადგან უმეტესობა ადამიანებისა, რომლებიც ამ სიაში შევლენ უკავშირდება 20 ივნისის რამეს და შემდგომ განვითარებულ მოვლენებს" - განაცხადა თინა ბოკუჩავამ.
გიორგი ვაშაძე ამბობს, რომ დაიწყება აქციები, შეხვედრები მოსახლეობასთან. მისი თქმით ხელისუფლება კონკრეტულ დათმობებზე უნდა წავიდეს.
"იანვრის მეორე ნახევრიდან დაიწყება მასშტაბური აქციები, შეხვედრები მოსახლეობასთან, რომ მაქსიმალურად გამოვაღვიძოთ საზოგადოება. ქვეყანა არის დიდ პოლიტიკურ, სოციალურ და ეკონომიკურ კრიზისში და ჩვენ უნდა ავუხსნათ საზოგადოებას, რომ ხელისუფლება კონკრეტულ დათმობებზე უნდა წავიდეს, იმისათვის, რომ ქვეყანამ დაიწყოს ნორმალური განვითარება. ჩვენ ასევე ვმსჯელობთ თბილისში მასშტაბური აქციის ჩატარების თარიღზე, რომელზეც თვის ბოლომდე შევჯერდებით, გარდა ამისა იქნება პიკეტირებები და წინააღმდეგობების სხვადასხვა კერები" - განაცხადა გიორგი ვაშაძემ.