საქალაქო სასამართლოში ლაშა ჩხარტიშვილისა და ნოდარ რუხაძის სასამართლო პროცესები მიმდინარეობს. ლაშა ჩხარტიშვილი სასამართლო სხდომაზე მოვიდა მომზადებული ზურგჩანთით, რადგან აქვს მოლოდინი, რომ პატიმრობას შეუფარდებენ.

„მიუხედავად იმისა, რომ რეჟიმი იჭერს ყველას. ჩემი დაკავება უკვე მეორედ აშკარას ხდის, რომ ეს იყო პერსონალური. გამომდინარე იქიდან, რომ საქართველოში არსებული ჯარიმები არის წარმოუდგენელი რაოდენობის და ყველასთვის, მათ შორის ჩემთვისაც, რთულია მისი გადახდა, მე მზად ვარ პატიმრობისთვის. თუმცა ეს მოსამართლის გადასაწყვეტი იქნება. მნიშვნელობა არ აქვს, გამოყენებული იქნება პატიმრობა თუ ჯარიმა, მე ვპირდები ივანიშვილს რომ არ შევწყვეტ ბრძოლას“, - აცხადებს ლაშა ჩხარტიშვილი.

სამოქალაქო აქტივისტი, ნოდარ რუხაძე აცხადებს, რომ მათ არ აქვთ მოლოდინი, რომ მოსამართლე სამართლიან გადაწყვეტილებას მიიღებს. მისივე თქმით, ეს ყველაფერი დადგმული ფარსია და ხალხის დაშინებას ემსახურება.

„არ არსებობს ფაქტობრიივი მტკიცებულება, რომ მოქალაქეებმა ჩავიდინეთ წვრილმანი ხულიგნობა. ეს არის თეატრალიზებული წარმოდგენა და ფარსი, რათა მოქალაქეები უბრალოდ დააშინონ და უთხრან, რომ თუ გამოვლენ აქციაზე, დააპატიმრებენ, გადაახდევინებენ ჯარიმას ან გაუშვებენ საპატიმროში“, - ამბობს ნოდარ რუხაძე.

ცნობისთვის, რუსთაველის გამზირზე მალხაზ მაჩალიკაშვილის კარვის აღების დროს ინციდენტი მოხდა, რა დროსაც ლაშა ჩხარტიშვილი, ნოდარ რუხაძე და კიდევ ორი პირი დააკავეს. ყველა მათგანს პოლიციისადმი დაუმორჩილებლობასა და წვრილმან ხულიგნობას ედავებიან.