EMC გიორგი მამალაძის არშეწყალებაზე: პრეზიდენტის დასაბუთება აცდენილია შეწყალების კონცეფციას

პოლიტიკა - 16:57, 06 Jan, 2020

1058

ადამიანის უფლებების სწავლებისა და მონიტორინგის ცენტრი პრეზიდენტის მიერ გიორგი მამალაძის შეწყალებაზე უარის თქმას ეხმაურება და ამბობს, რომ პრეზიდენტის მიერ უარის დასაბუთება შეწყალების კონცეფციიდან და მიზნებიდან "ამოვარდნილია".

EMC-ში აღნიშნავენ, რომ პრეზიდენტის მიერ გაჟღერებული გადაწყვეტილება შეწყალების მექანიზმის მიმართ ჰუმანურ მოლოდინებს ამძიმებს და ის პრეზიდენტის ხელში თვითნებური პოლიტიკური ბერკეტი უფრო ჩანს, ვიდრე ადამიანის უფლებების და ჰუმანიზმის დაცვაზე ორიენტირებული მექანიზმი.

"ამ საქმეზე და მის პოლიტიკურ და საეკლესიო კონტექსტზე ღია დისკუსიები როგორც ჩანს საპატრიარქოსთვის მიუღებელი იყო და ამდენად შეწყალების შესახებ სინოდის შუამდგომლობა უფრო ტაქტიკური ნაბიჯი იყო.

2020 წლის 6 იანვარს წინასაშობაოდ პრეზიდენტის მიერ მიღებულმა გადაწყვეტილებამ, დეკანოზის შეწყალებაზე უარის შესახებ, ეს ეჭვები კიდევ უფრო გააძლიერა. იმ პირობებში, როდესაც ხელისუფლება მუდმივად არღვევს სეკულარულ მიდგომებს და თავად პრეზიდენტი საპატრიარქოს და პატრიარქის მიმართ ღია და პრობლემურ ლოიალობას ავლენს, ცხადია, იმის განცდა, რომ ამ საქმეზე პრეზიდენტი საპატრიარქოსგან დამოუკიდებელ გადაწყვეტილებას მიიღებდა, არ არსებობს. ამავდროულად უნდა ითქვას, რომ შეწაყლებაზე პრეზიდენტის უარის დასაბუთება მკვეთრად პრობლემურ მიდგომებს და ახსნას შეიცავს. მისი დასაბუთება ამოვარდნილია შეწყალების კონცეფციიდან და მიზნებიდან. არც ერთი კომენტარი პრეზიდენტს არ გაუკეთებია სასულიერო პირის მძიმე ჯანმრთელობისა და ემოციური მდგომარეობის, საპატიმრო პიროიბებში სასჯელის მოხდის სირთულეების და ასევე, ამ საქმეზე მართლმსაჯულების ხარვეზების შესახებ",- ნათქვამია განცხადებაში.