კომუნიკაციების ეროვნული კომისიის (GNCC) ინფორმაციით, „მთავარი არხი“ წერილობით გააფრთხილეს და “არაწინასაარჩევნო პერიოდში პოლიტიკური რეკლამების ეთერიდან მოხსნა მოითხოვეს”.

საუბარია „მთავარი არხის“ ეთერში ბიძინა ივანიშვილზე გაშვებულ ვიდეორგოლზე, რაზეც GNCC ამტკიცებს, რომ არხს პოლიტიკური რეკლამის ეთერში გაშვების უფლება მხოლოდ წინასაარჩევნო პერიოდში შეუძლია.

"კომუნიკაციების კომისიამ საჯარო სხდომაზე იმსჯელა აღნიშნულ საკითხთან დაკავშირებით და დაადგინა, რომ ,,მთავარმა არხმა“ თავის ეთერში განათავსა და გაავრცელა რეკლამა, რომელშიც დარღვეულია გავრცელების წესის შესახებ საქართველოს კანონმდებლობით დადგენილი მოთხოვნები. შესაბამისად, კომუნიკაციების კომისიამ ,,მთავარ არხს“ საქართველოს კანონმდებლობის, მათ შორის, საქართველოს ზოგადი ადმინისტრაციული კოდექსის, „მაუწყებლობის შესახებ“ საქართველოს კანონის, ,,რეკლამის შესახებ“ საქართველოს კანონის და ,,საქართველოს კომუნიკაციების ეროვნული კომისიის საქმიანობის მარეგულირებელი წესების“ დარღვევის გამო, წერილობით გააფრთხილა და აღნიშნული ვიდეორგოლების ბადიდან დაუყოვნებლივ ამოღება დაავალდებულა.

არაწინასაარჩევნო პერიოდში პოლიტიკური რეკლამის განთავსების საკითხი, როგორც მაუწყებლების, ასევე რიგი პოლიტიკური პარტიების მხრიდან დავის საგანი არაერთხელ გამხდარა. კომუნიკაციების კომისიის მიერ მიღებული გადაწყვეტილებები მაუწყებლებმა სასამართლოშიც გაასაჩივრეს, თუმცა პირველი ინსტანციის სასამართლომ კომისიის გადაწყვეტილება ძალაში დატოვა. გარდა ამისა, 2019 წელს არაწინასაარჩევნო პერიოდში წინასაარჩევნო/პოლიტიკური რეკლამის დაშვების მიზნით, “პატრიოტთა ალიანსის“ მიერ საკანონმდებლო ინიციატივა მომზადდა, რომელსაც საქართველოს პარლამენტმა მხარი არ დაუჭირა,”-წერია GNCC-ის განცხადებაში.

“მთავარი არხის” იურისტი თამთა მურადაშვილი GNCC-ის გადაწყვეტილებას ცენზურად აფასებს და აცხადებს, რომ ეს პოლიტიკური რეკლამა არ არის და კანონი მსგავსი კლიპის გაშვებას არ კრძალავს.

“ცხადია, ეს პირდაპირი ცენზურაა. გასცდა კომისია საკუთარ უფლებამოსილებას, მათ არ აქვთ აზრის გამოხატვისა და მით უმეტეს პოლიტიკური აზრის გამოხატვის შეზღუდვის უფლება. ეს არხის სარედაქციო პოლიტიკით შექმნილი კლიპები იყო და არა პოლიტიკური რეკლამა. მუხლების მითითება საერთოდ ვერ შეძლეს, რადგან კანონი მსგავსი კლიპების გაშვებას არ კრძალავს, შესაბამისად, უკანონო გადაწყვეტილებაა. ცხადია ამას სასამართლოში გავასაჩივრებთ, თუმცა სასამართლოც ამ ხელისუფლების არის და მათი იმედი არ გვაქვს,” – ამბობს მურადაშვილი.