საქართველოს პრემიერ-მინისტრმა, გიორგი გახარიამ მთავრობის დღევანდელ სხდომაზე საგარეო პოლიტიკის მიმართულებით 2019 წლის მიღწევებზე ისაუბრა.

ჩვენთვის ყველაზე მნიშვნელოვანია, ქვეყნის ინსტიტუტებისა და დემოკრატიზაციის მიმართულებით, ყოველდღიურად ჩვენს მოქალაქეებსა და პარტნიორებს დავანახოთ ის პროგრესი, რომელიც თვალსაჩინოა და რომლითაც სარგებლობს თითოეული ჩვენი მოქალაქე, – განაცხადა პრემიერმა.

„წელს ჩვენ გავხდით ევროსაბჭოს თავმჯდომარე ქვეყანა და ჩვენ ერთმნიშვნელოვნად სრულად უნდა გამოვიყენოთ ეს შესაძლებლობა იმისთვის, რომ ჩვენს ევროპელ პარტნიორებს, ჩვენს მეგობრებს, ჩვენს კოლეგებს გავაცნოთ ის მიღწევები დემოკრატიზაციის, რომელიც გვაქვს ქვეყანაში. ის გამოწვევები, რომელიც გვაქვს და დავანახოთ ის ყოველდღიური პროგრესი, რომელსაც ახდენს საქართველოს მოქალაქე და ქართული საზოგადოება.

ამავდროულად, უნდა გვახსოვდეს, რომ 2019 წელი იყო უაღრესად მნიშვნელოვანი წელი საქართველოსა და ნატო-ს თანამშრომლობის და პარტნიორობის თვალსაზრისით. ეს იყო უაღრესად მდიდარი წელი ერთობლივი ვარჯიშებით, რომლის რაოდენობაც იყო უპრეცედენტო. ასევე არ უნდა დაგვავიწყდეს, რომ 2019 წელს ნატო-ს და საქართველოს თანამშრომლობაში გაჩნდა ახალი განზომილება, შავი ზღვის უსაფრთხოება, რომელიც აძლევს საქართველოს შესაძლებლობას, კიდევ ერთი მიმართულებით გაუწიოს ნატო-ს უაღრესად მნიშვნელოვანი პარტნიორობა. ეს არის ჩვენი მისია შავ ზღვაში, ვიყოთ უსაფრთხოების გარანტები ჩვენს საერთაშორისო პარტნიორებთან ერთად.

რა თქმა უნდა, ასევე ხაზგასმით უნდა აღვნიშნოთ, რომ ჩვენს ძირითად სტრატეგიულ პარტნიორთან არასდროს გვქონია ასეთი ღრმა და ყოვლისმომცველი პარტნიორობა, რომელიც გვაქვს ჩვენ დღეს, რომელიც დაფიქსირდა 2019 წელს და რომელიც მოიცავს სრულად ქვეყნისთვის ყველაზე მნიშვნელოვან განზომილებებს, როგორიცაა უსაფრთხოების სფეროში თანამშრომლობა ამერიკის შეერთებულ შტატებთან, ეკონომიკის მიმართულებით ის პროგრესი, რომელიც ჩვენ გვაქვს და რა თქმა უნდა, ქვეყნის დემოკრატიზაციის მიმართულებით“,- განაცხადა გიორგი გახარიამ.