29 დეკემბერს სულხან-საბა ორბელიანის უნივერსიტეტს ვატიკანის წმინდა საყდრის სახელმწიფო მდივანი კარდინალი პიეტრო პაროლინი ეწვია.

კარდინალი პიეტრო პაროლინის საქართველოში დატვირთული სამ დღიანი ვიზიტის ფარგლებში, საბაუნი ერთადერთი უნივერსიტეტია რომელსაც კარდინალი პირადად ესტუმრა.

კარდინალს უმასპინძლა და უნივერსიტეტი დაათვალიერებინა საბაუნის რექტორმა, პროფესორმა ვაჟა ვარდიძემ. შემდეგ გაიმართა შეხვედრა ადმინისტრაციასთან, პროფესორებსა და სტუდენტებთან.

პირველი სიტყვით საბაუნის დამფუძნებელი ამიერკავკასიის ეპისკოპოსი ჯუზეპე პაზოტო წარსდგა. მან კარდინალს მადლობა მოახსენა ვიზიტისთვის და მოუთხრო უნივერსიტეტის მოღვაწეობის შესახებ. ეპისკოპოსმა სიტყვა გადასცა უნივერსიტეტის რექტორს პროფესორ ვაჟა ვარდიძეს, რომელმაც აღნიშნა ამ ვიზიტის მაღალი მნიშვნელობა საქართველო-ვატიკანის ურთიერთობაში და ისაუბრა მნიშვნელოვანი საიუბილეო თარიღების შესახებ, რომელსაც ეს ვიზიტი მიეძღვნა.

ასევე სიტყვით წარსდგა საბაუნის ჰუმანიტარულ და სოციალურ მეცნიერებათა ფაკულტეტის

დეკანი, პროფესორი გოჩა ბარნოვი, რომელმაც კონფესიათა შორის ურთიერთობებზე ისაუბრადა ხაზი გაუსვა ამ მხრივ უნივერსიტეტის როლზე.

მისალმებების შემდეგ საბაუნის ფოლკლორულმა ანსამბლმა შეასრულა საშობაო საგალობელი, რომელიც სპეციალურად დღევანდელი დღისათვის მომზადდა.

კარდინალმა მადლობა გადაუხადა დამსწრე საზოგადოებას შეხვედრაზე დასწრებისთვის, ისაუბრა უნივერსიტეტის როლსა და მის მნიშვნელობაზე თანამედროვე საზოგადოებაში. “ამ უნივერსიტეტმა (საბაუნიმ) უნდა გააგრძელოს სიმბოლური ხიდის მოვალეობა კულტურათა შორის დიალოგში.” - აღნიშნა მაწმინდა საყდრის მდივანმა კარდინალმა პიეტრო პაროლინიმ. დასასრულს კარდინალმა დამსწრე საზოგადოებას გადმოსცა პაპი ფრანცისკეს საშობაო მილოცვა.

რექტორმა პროფ. ვაჟა ვარდიძემ უნივერსიტეტის სახელით კარდინალს საჩუქრად გადასცა ქართული ტრადიციული ტიხრული მინანქრის ტექნიკით დამზადებული საბაუნის გერბი.