აშშ-ის საელჩო ვაჟა გაფრინდაშვილის გათავისუფლებას ეხმაურება და საოკუპაციო რეჟიმს გადასასვლელი პუნქტების გახსნისკენ მოუწოდებს

პოლიტიკა - 16:47, 28 Dec, 2019

1194

საოკუპაციო რეჟიმის მიერ უკანონოდ დაკავებული ექიმის, ვაჟა გაფრინდაშვილის გათავისუფლებას ეხმაურება საქართველოში ამერიკის შეერთებული შტატების საელჩო.

ამასთან, დიპლომატიური წარმომადგენლობა მოუწოდებს ოკუპირებული ცხინვალის დეფაქტო ხელისუფლებას, რომ გახსნას გადასასვლელი პუნქტები, მოსახლეობის თავისუფლად გადაადგილებისა და ჰუმანიტარული დახმარების მიწოდებისთვის.

"მივესალმებით ინფორმაციას სამხრეთ ოსეთის დე ფაქტო ხელისუფლების მიერ ექიმი ვაჟა გაფრინდაშვილის გათავისუფლების შესახებ. ვუერთდებით ყოველი ქართველისა და საერთაშორისო საზოგადოების წარმომადგენელთა სიხარულს იმასთან დაკავშირებით, რომ იგი შინ დაბრუნდა და დღესასწაულებს ოჯახთან ერთად გაატარებს. ჩვენ კიდევ ერთხელ მოვუწოდებთ დე ფაქტო ხელისუფლებას გახსნას ადმინისტრაციული გამყოფი ხაზის მიმდებარე გადასასვლელი პუნქტები და დაუშვას ადგილობრივი მოსახლეობის თავისუფალი გადაადგილება და ჰუმანიტარული დახმარების მიწოდება. ამერიკის შეერთებული შტატები ინარჩუნებს საქართველოს სუვერენიტეტისა და ტერიტორიული მთლიანობის მიმართ ურყევ ერთგულებას", - წერია აშშ-ის საელჩოს მიერ გავრცელებულ განცხადებაში.

ექიმი ვაჟა გაფრინდაშვილი ოკუპირებული ცხინვალის დე-ფაქტო რეჟიმმა 9 ნოემბერს, ე.წ საზღვრის განზრახ გადაკვეთისთვის დააკავა. ცხინვალის ე.წ. სასამართლომ გაფრინდაშვილს 2-თვიანი წინასწარი პატიმრობა შეუფარდა. იგი დღეს დილით გათავისუფლდა.