ფეისბუქის მიერ თავისი სივრციდან, ხელისუფლებასთან აფილირებული 400-მდე ქართული ანგარიშის გაქრობას ეხმაურება „ერთიანი საქართველო-დემოკრატიული მოძრაობის“ ერთ-ერთი ლიდერი. ანზორ ბიწაძე ქართული ოცნების დეპუტატის კარლო კოპალიანის მიერ საპასუხოდ გაკეთებულ განცხადებებს „ქართული ოცნების“ მენტალურ მარგინალიზაციას უწოდებს და მიიჩნევს, რომ მმართველი პარტიის მარცხი გარდაუვალია.

“ქვეყნის და ხელისუფლების იმიჯისთვის დამაზარალებელი მოვლენების მთელი კასკადია და აშკარაა, ამას ხელისუფლებაში “არ ხედავენ” . ფეისბუქის ადმინისტრაციის ნაბიჯი, მე პირადად, როგორც საქართველოს მოქალაქეს ძალიან მეუხერხულება. საქვეყნოდ გამოჩნდა და დადასტურდა, რომ ქართულმა ოცნებამ, სოციალურ ქსელებში თაღლითობაში, მილიონი ლარი დახარჯა! კატასტროფული საერთაშორისო პრესა, არაადევაქტური გადაწყვეტილებები და ელჩების თანდასწრებით წარმოებული მოლაპარაკებები, რაც ქართულ ოცნებას სურს ღია ვაჭრობას დაამგავსოს, ნათელს ხდის ძალიან მძიმე ფაქს - ქართული ოცნების მენტალური მარგინალზაცია შეუქცავადია და მათი მარცხი გარდაუვალი!” - აცხადებს ანზორ ბიწაძე.

პარასკევს, 20 დეკემბერს, "ფეისბუქმა" თავისი სივრციდან გააქრო 400-ზე მეტი ქართული ანგარიში. მათგან ყველა: 39 პროფილი, 344 გვერდი, 13 ჯგუფი და 22 Instagram-ანგარიში საქართველოს ხელისუფლებასთან აფილირებული იყო და მათი ადმინები ხელისუფლების ნარატივს, მის საერთო მესიჯბოქს ავრცელებდნენ, ამასთან, ანტიდასავლურ კამპანიას ეწეოდნენ და ოპოზიციურ ლიდერებზე სხვადასხვა ჭორებს ტირაჟირებდნენ.

ქართველ ტროლ-ბოტებზხე შეტევას "ფეისბუქმა" განცხადება მოაყოლა, სადაც აღნიშნა, რომ ამ ანგარიშების "საქმიანობა" სპეციალური გამოძიებით დაადგინა და გაარკვია, რომ "ეს კამპანია "ქართული ოცნების" ხელისუფლებას უკავშირდება".

ასეთ მასშტაბურ შეტევებს "ფეისბუქის" ადმინისტრაცია ძალიან იშვიათ შემთხვევებში ახორციელებს. დაახლოებით ამ მასშტაბის იყო წმენდა, რომელიც "ფეისბუქმა" რუსეთსა და ჩინეთში ჩაატარა და ეს წმენდა პირდაპირ ხელისუფლებას დაუკავშირა. ამიერიდან საქართველოც სწორედ იმ ქვეყნების სიაშია, სადაც ხელისუფლება ყალბ გვერდებსა და პროფილებს ქმნის ან/და აფინანსებს: ორგანიზაციის ცნობით, ფეისბუქსა და ინსტაგრამზე ამ გვერდებსა და პროფილებს ჯამში 316 000-ზე მეტი ამერიკული დოლარი აქვთ დახარჯული.