ზურაბ გურული - აშშ-ში მყოფი ქართველი სამხედრო ქირურგი, რომელიც, ამავდროულად, საინტერესო მწერალი და მთარგმნელიცაა (ახლახან გამოიცა მისი წიგნი "სპილო წყვდიადში", რომლის მთავარი პერსონაჟები ექიმები არიან), სპეციალურად ცოტნე გამსახურდიას დასახმარებლად აშშ-დან თბილისში ჩაფრინდა.

ამის შესახებ სოციალურ ქსელში ამერიკაში მყოფი ქართველი ემიგრანტები წერენ და ზურაბ გურულს მადლობას უხდიან.

ზურაბ გურული აშშ-ის მონტგომერის სახელობის ფედერალური კლინიკის ანესთეზიისა და ქირურგიის დეპარტამენტების დირექტორი, მისისიპის უნივერსიტეტის კლინიკური ანესთეზიოლოგიის პროფესორი, ქართულ ამერიკული სამედიცინო ასოციაციის პრეზიდენტია.

ცნობილი ემიგრანტი თამაზ ალვანელი (თამაზ ბაჩულაშვილი) წერს:

"უდიდესი მადლობა ამერიკაში მოღვაწე ქართველ ექიმს (ქირურგს), მწერალს, პოეტს, მთარგმნელს და საზოგადო მოღვაწეს, ჩვენს ძმას და მეგობარს ზურაბ გურულს... ახლაღა გავიგე, რომ იგი სპეციალურად ცოტნეს დასახმარებლად ჩაფრინდა აშშ-დან საქართველოში.

მე ეჭვი არ მეპარება ქართველ ექიმთა ცოდნაში და რეპუტაციაში რომლებიც ახლა ცოტნეს დასტრიალებენ თავს და მაქსიმალურს აკეთებენ მის გადასარჩენად... ზურა გურული სულ სხვა იმედია და როგორც სამხედრო ექიმი, უდიდესი გამოცდილება აქვს მსგავს პაციენტებთან მუშაობის - მისი რჩევები და გამოცდილება ამ კონკრეტულ შემთხვევაში დიდად დაეხმარებათ როგორც ექიმებს სწორი მკურნალობისთვის, ასევე ცოტნეს მალე წამოდგეს იგი ფეხზე".

შე3გახსენებთ, ცოტნე გამსახურდია მძიმედ დაჭრეს გალის ქუჩაძე, საკუთარ სახლთან ახლოს. მომხდარიდან მეორე დღეს შსს-მ 5 პირი დააკავა, მათგან ორი - დანაშაულის შეუტყობინებლობის ბრალდებით. ცოტნე გამსახურდიას ურთულესი ნეიროქირურგიული ოპერაცია ჩაუტარდა, რის შემდეგაც ნეიროქირურგმა განაცხადა, რომ ცოტნე გამსახურდიას მდგომარეობა სტაბიულურად მძიმეა. ის ამ დრომდე მართვად სუნთქვაზე იმყოფება.