"წარმოუდგენელია, რომ ღვინის ხარისხზე სუფრულ გარჩევას ამგვარი სისასტიკე მოყოლოდა"

"წარმოუდგენელია, რომ ღვინის ხარისხზე სუფრულ გარჩევას ამგვარი სისასტიკე მოყოლოდა" - ცოტნე გამსახურდიას ადვოკატი

პოლიტიკა - 16:19, 22 Dec, 2019

712

ცოტნე გამსახურდიას ადვოკატის, ამირან გიგუაშვილის განცხადებით, ინფორმაცია, რომ თითქოსდა ცოტნე გამსახურდია იყო კონფლიქტის ინიციატორი და დაპირისპირება ღვინის ხარისხს უკავშირდებოდა, ბრალდებულების მიერ შემოთავაზებული ვერსიაა და არ შეიძლება დამაჯერებელი იყოს.

„სასამართლომ უნდა მიიღოს ის გადაწყვეტილება, რასაც კანონი ითვალისწინებს და კანონი ითვალისწინებს, რომ როდესაც ბრალდებულები არ თანამშრომლობენ გამოძიებასთან და ემალებიან, აღკვეთი ღონისძიების სახით პატიმრობა იქნეს გამოყენებული, მაგრამ ჩვენ სხვა ინტერესები გვაქვს, რომ მაქსიმალური სიცხადე იყოს შემოტანილი ამ საქმეში.

გარკვეული ინფორმაციების გაშუქება ხდება, რომ თითქოსდა ცოტნე იყო ინიციატორი კონფლიქტის და ღვინის ხარისხს უკავშირდებოდა, ეს ვერსია არის ბრალდებულის მიერ შემოთავაზებული და არ შეიძლება დამაჯერებელი იყოს. საბედნიეროდ, იმედი გვაქვს, ცოტნე მალე იქნება კონტაქტური და მეტ სიცხადეს მოჰფენს ამ კონკრეტულ შემთხვევას.

სისასტიკე, რომელიც მის მიმართ განხორციელდა არ იყო ერთი ადამიანის მიერ ჩადენილი. შეუძლებელია ერთი ადამიანის მიერ ყოფილიყო ჩადენილი. შეუძლებელია, ყავარჯნიან ადამიანს მიეყენებინა ასეთი დაზიანებები და მეორეც, უბრალოდ წარმოუდგენელია, რომ ღვინის ხარისხზე, სუფრულ გარჩევას ამგვარი სისასტიკე მოყოლოდა, მითუმეტეს იქ იყვნენ ადამიანები, ვისაც შეეძლო ჩარევა და გაშველება“,- განაცხადა ადვოკატმა.