Facebook-ის შეტევა ქართველ ტროლ-ბოტებზე: ხელისუფლებასთან აფილირებული 418 ქართული ანგარიში გაუქმებულია

პოლიტიკა - 23:39, 20 Dec, 2019

2010

"ფეისბუქმა" თავისი სივრციდან გააქრო 400-ზე მეტი ქართული ანგარიში. მათგან ყველა: 39 პროფილი, 344 გვერდი, 13 ჯგუფი და 22 Instagram-ანგარიში საქართველოს ხელისუფლებასთან აფილირებუკლი იყო და მათი ადმინები ხელისუფლების ნარატივს, მის საერთო მესიჯბოქს ავრცელებდნენ, ამასთან, ანტიდასავლურ კამპანიას ეწეოდნენ და ოპოზიციურ ლიდერებზე სხვადასხვა ჭორებს ავრცელებდნენ.

ქართველ ტროლ-ბოტებზხე შეტევას "ფეისბუქმა" განცხადება მოაყოლა, სადაც აღნიშნა, რომ ამ ანგარიშების "საქმიანობა" სპეციალური გამოძიებით დაადგინა და გაარკვია, რომ "ეს კამპანია "ქართული ოცნების" ხელისუფლებას უკავშირდება",

"ეს გვერდები პოზიციონირებდნენ, როგორც ახალი ამბების სააგენტოები და იმიტირებდნენ პოლიტიკურ პარტიებს, საჯარო პირებსა და მედიებს. გვერდების ადმინასტრატორები და ანგარიშების მფლობელები, როგორც წესი, ადგილობრივ ახალ ამბებსა და პოლიტიკურ საკითხებზე პოსტავდნენ, მაგალითად, როგორიცაა არჩევნები, სამთავრობო პოლიტიკა, მაღალჩინოსნები, ოპოზიციისა და ადგილობრივი აქტივისტური ჯგუფების კრიტიკა.

მიუხედავად იმისა, რომ ამ ანგარიშების უკან მდგომი ადამიანები ცდილობდნენ, დაეფარათ თავიანთი იდენტობა და კოორდინირებული მუშაობა, ჩვენი გამოძიებით ეს აქტივობები საქართველოში მოქმედ სარეკლამო კომპანია პანდასა და ქართული ოცნების ხელისუფლებას უკავშირდება,"- წერია განცხადებაში (შენიშვნა: "ტაბულის" თარგმანი).

ასეთ მასშტაბურ შეტევებს "ფეისბუქის" ადმინისტრაცია ძალიან იშვიათ შემთხვევებში ახორციელებს. დაახლოებით ამ მასშტაბის იყო წმენდა, რომელიც "ფეისბუქმა" რუსეთსა და ჩინეთში ჩაატარა და ეს წმენდა პირდაპირ ხელისუფლებას დაუკავშირა. ამიერიდან საქართველოც სწორედ იმ ქვეყნების სიაშია, სადაც ხელისუფლება ყალბ გვერდებსა და პროფილებს ქმნის ან/და აფინანსებს: ორგანიზაციის ცნობით, ფეისბუქსა და ინსტაგრამზე ამ გვერდებსა და პროფილებს ჯამში 316 000-ზე მეტი ამერიკული დოლარი აქვთ დახარჯული.