"მოიტანენ ისეთ რაღაცას, რაც ხელისუფლებას ერთპიროვნული მმართველობის გაგრძელების გარანტიას მისცემს" - ოპოზიცია ხელისუფლებასთან შესახვედრად ემზადება

პოლიტიკა - 17:07, 19 Dec, 2019

655

„ლეიბორისტული პარტიის“ ოფისში ოპოზიციის შეხვედრა დასრულდა. როგორც შეხვედრიდან გამოსული ლიდერები აღნიშნავდნენ, საუბრის თემა სხვა პოლიტიკურ საკითხებთან ერთად „ქართული ოცნების“ წარმომადგენლებთან ხვალ დაანონსებული შეხვედრა იყო.

„ნაციონალური მოძრაობის“ ლიდერი გრიგოლ ვაშაძე დარწმუნებულია, რომ „ოცნების“ ლიდერები ცვალინდელ შეხვედრაზე მოიტანენ ისეთ საარჩევნო წინადადებას, „რაც ხელისუფლებას გარანტიას მისცემს, რომ ერთპიროვნული მმართველობა გაგრძელდეს“.

„თუ საერთოდ მოიტანენ, მოიტანენ ისეთ რაღაცას, რაც მათ გარანტიას მისცემს, რომ ერთპიროვნული მმართველობა გაგრძელდეს. არ ვამბობ ერთპარტიულსაც კი, ერთპიროვნული. დაველოდოთ. ხვალ ყველაფერს გეტყვით“, -აცხადებს ვაშაძე.

„ევროპული საქართველოს“ ერთ-ერთმა ლიდერმა დავით ბაქრაძემ კი განაცხადა, რომ ხელსუფლებასთან მოლაპარაკების რეჟიმში რჩებიან, თუმცა ეს აქციების პარალელურად ხდება. მისივე თქმით, ხელისუფლება თავიდან აცხადებდა, რომ საერთოდ არ აპირებდა მოლაპარაკებებს ოპოზიციასთან , შემდეგ აცხადებდნენ, რომ მხოლოდ ოპოზიციისგან ელოდებოდნენ წინადადებებს და თავად არაფერს შესთავაზებდნენ , ხვალ კი დადგება ის დღე , როდესაც ხელისუფლება უკან დაიხევს და საკუთარ წინადადებას მოიტანს.

„ლუკა სირაძის გარდაცვალებამ მნიშვნელოვანი კორექტირება შეიტანა ჩვენს პოლიტიკურ დღის წესრიგში . კერძოდ, ჩვენ უარი ვთქვით პარლამენტის პიკეტირებაზე , რომელიც დღეს და ხვალ უნდა გამართულიყო, მაგრამ რა თქმა უნდა, პოლიტიკური ბრძოლა გაგრძელდება . კერძოდ, ამ კვირის ბოლოს, კვირა დღეს ბათუმში იქნება ფართომასშტაბიანი საპროტესტო აქცია და მსვლელობა იგივე მოთხოვნებით. ოპოზიცია ერთიანია საკუთარ მიდგომებსა და პოზიციებში, ვხედავთ, რომ ნაბიჯ-ნაბიჯ ხელისუფლება იხევს უკან. პროცესი ნაბიჯ-ნაბიჯ სწორი მიმართულებით მიდის, რაც საპროტესტო აქციების და საგარეო ზეწოლის დამსახურებაა“,-აცხადებს ბაქრაძე.